Panon Kan Makaliktar ed Anggaan na Sayan Mundo?

DEDESKRIBIEN na Biblia so anggaan na sayan peles a sistema na bengabengatla bilang “agew na sanok, agew na gonigon tan irap, agew na kabagbag tan pankibalatar, agew na bilunget tan uddiem, agew a malurem tan makapal a bilunget.” (Sofonias 1:15) Seguradon aliwan saya so nengneng na agew a tatalaranan mo! Ingen, binilin nen apostol Pedro iray kapara ton Kristiano a sikaray ‘manalagar tan manpilalek ed isabi agew na Dios, a sikato so katunaw na saray tawen dia ed idalang da, tan saray elementos natunaw ed manliob a petang! Balet, unong ed sipan to alagden tayo so saray tawen a balo tan dalin a balo, a sikara so panaayaman na katunongan.’​—2 Pedro 3:12, 13.

Agtutukoyen dia nen Pedro so kaderal na literal a katawenan tan dalin. “Saray tawen” tan “dalin” a tutukoyen nen Pedro ed sayan konteksto so mangisisimbolo ed peles ya abulok iran gobierno na too tan ed agmaridios a sosyedad na too. “Say agew nen Jehova” so agmaneral ed mismon dalin balet “bagbagen to so saray managkasalanan to a manlapu ed sikato.” (Isaias 13:9) Parad saraman so “mansibek tan manakis lapu ed amin a kadimlaan” a nagagawa natan ed marelmeng a sosyedad na too, say agew nen Jehova so magmaliw sirin ya agew na kilalaban.​—Ezequiel 9:4.

Sirin, panon a makaliktar so sakey ed “baleg tan makapataktakot ya agew nen Jehova”? “Say salita nen Jehova” a niparungtal ed sakey ed saray propeta to so mangeebat ed satan a tepet: “Nagawa naani, ya anggan siopaman ya ontawag ed ngaran nen Jehova; nilaban naani.” (Joel 1:1; 2:31, 32) Maliket iray Tastasi nen Jehova ya ontulong ed sika a naaralan no anto so kabaliksan na itawag ed ngaran nen Jehova.