Report na Saray Manangiyabawag na Panarian

Panabi ed Saramay Mairap a Sabien

PANBABANIKELAN na saray Tastasi nen Jehova ya ipasabi ed amin a nayarian da so nipaakar ed mensahe na Panarian. No maminsan et kaukolan so nikaduman pansagpot pian nasabi iramay matalag a naromog ed abung da. (Marcos 13:10) Nipaakar ed saya, sakey a ministro ya espisyal payunir diad bansa na Abalaten ya Amerika so angisalaysay ed onggendan ya eksperiensya.

“Sakey ya agew et naamtaan kon ombisita so gobernador ed teritoryan akaasainan min sanasawa. Lapud mapatnag a sikatoy sakey ed saramay mataltalag a nasabi ed abung, sikatoy sinulat ko ya inlaktip met iray pigaran publikasyon na Biblia, a singa say brosyur a No Antoy Kakaukolanen na Dios ed Sikatayo? tan saray libron Mankind’s Search for God tan Pikakabat a Mangitonton ed Andi-anggaan a Bilay. Insalaysay ko ed sulat ko so gagala na sarayan palapagan.

“Lapud interesado ak ya amtaen so reaksion to nipaakar ed literatura, kinerew koy pakapinengneng ed sikato. Pigaran simba ed saginonor et naabobonay piarap ko ed sikato, tan inawit ko so kopya na say video a Jehovah’s Witnesses​—The Organization Behind the Name. Nansumpal so impiarap ed loob na ngalngali duay oras. Kayari na impanbantay na video a kaibay gobernador, tinepetan ko no antoy nibaga to. Oniay inyebat to: ‘Anggapo lay arum ya organisasyon diad dalin a mipara ed sikayo. Komon ta walaan ak na totoon singa sikayo ya ontulong ed siak a manumpal ed saray proyektok a parad gobierno!’ Insan to tinepet no kasin akakar ak la ed sankamundoan a hedkuarter na organisasyon tayo. Imbagak ed sikato ya anggaman pirawat ko la itan sanen manedad ak ni na 14, andian ak ni na pankanawnawa a napasyar so sankamundoan a hedkuarter tayo diad Brooklyn, New York. Sakey itan ed saray mairap a nadampot a kalat. Ninengneng toak a maong. Insan inkuanton labay ton niwala itan a pankanawnawa ed siak. Sineguro ton naikdan kami na saray permit a kakaukolanen na ley tan inikdan to kami na ticket ed eroplano bilang regalo!

“Regular la natan a makakaawat so gobernador na saray magasin a Panag-Bantayan tan Awake! Komon ta nigapo mi ed maganon panaon so pangiyaral na Biblia ed sikato.”