Sakey ya Okasyon ya Agmo Nepeg a Saewen

“Amin a maong a palangkap tan amin ya ayadyarin palangkap” so manlalapu ed Dios, say mangatatawen ya Ama tayo.​—Santiago 1:17.

SAY sankabalgan a regalo ya inter na Dios ed makasalanan a katooan et say probisyon a kisalba manlapud kasalanan tan ag-inkayadyari panamegley na bogbogtong ya Anak to, si Jesu-Kristo. Say impatey nen Jesus, bilang Mananondon tayo, so nanggawan posibli ed andi-anggaan a bilay diad paraison dalin. Diad Lucas 22:19, niganggan ed sikatayon nodnonoten so impatey to.

Ampetapetang ya iimbitaan ka na saray Tastasi nen Jehova a mibiang ed sikara diad italineng ed ganggan nen Jesus. Sayan tinaon ya okasyon so selebraan kaselek na agew diad petsa a mipetekan ed Nisan 14 ed say lunar a kalendaryo na Biblia​—sano Simba, Abril 8, 2001. Tandaan iyan petsa pian agyo nalingwanan. Saray Tastasi nen Jehova ed lugar yo so makapangibaga ed sikayo na eksakton pasen tan oras na pantitipon.