Kasin Mangitarok na Kareenan ed Mundo so Relihyon?

MANLAPUD Agosto 28 anggad Agosto 31, 2000, nantitipon so masulok a 500 iran manangilaman a nanlalapud 73 iran bansa diad New York City. Nantitipon ira diad Nasyones Unidas parad “Say Komperensia na Relihyoso tan Espiritual Iran Lider Nipaakar ed Milenyon Kareenan ed Mundo.” Saray lider​—a dakel ed sikara so akaturbante, akakawes na maduya-duyaw, akasombreroy de-bago, odino andukey tan andeket iran kawes​—so mangirerepresenta ed dakerakel iran pananisia. Kaiba ed saraya et say Baha’i, Budismo, Hinduismo, Islam, Jainismo, Judaismo, Shinto, Sikhismo, Taoismo, Zoroastrianismo, tan saray relihyon na Kakristianoan.

Nantitipon iray delegado ed Nasyones Unidas parad unonan duay agew na apat-agew a komperensia. Balet, ag-inorganisa odino ginastosan na Nasyones Unidas so komperensia noagta saray nanduruman institusyon. Anggaman kuan, namparan say UN tan say relihyoso iran lider so nansalita nipaakar ed kaimportantian na pantutulongan pian panganggaen so inkaduka, rasismo, saray problema ed kaliberliber, guerra, tan saray armas parad palanit a panagderal.

Saray delegado so nampirma ed dokumento ya apauloan na “Paknaan Parad Sankamundoan a Kareenan.” Anggaman bidbiren dan say inkaramsak tan say guerra so “no maminsan et nagagawa lapud relihyon,” indeklara na dokumento a saray nampirma so “mikoopera ed Nasyones Unidas . . . parad pangiyalibansa na kareenan.” Anggapo balet iray espisipikon resolusyon a mangipatnag no panon iyan gawaen.

Diad komaduan agew, si Bawa Jain, say secretary-general na komperensia, so angisumpal ed manangilukas a diskurso to diad impangisalaysay a diad akadkauna iran taon et naimano to so sakey a painting ed Nasyones Unidas. Irerepresenta na painting so sakey a laki a mas atagey nen say bilding na United Nations Secretariat. Sikato so ontotoktok ed bilding a singano puerta iman. Diad leksab na litrato et walay titulon: “Prinsipe na Kareenan.” Inkuan nen Mr. Jain: “Walaan na aralem ya epekto [so litrato] ed siak sanen anengneng ko itan. Intetepet ko ed nanduruman totoo so kabaliksan na [satan]. Isipen kon walaan ak lay ebat natan. Say indagup yo’d dian amin ya espiritual tan relihyoso iran lider na mundo so mangipapatnag ed siak a [saya] so prinsipe na kareenan ya ontotoktok ed puerta na Nasyones Unidas.”

Ipaparungtal na Biblia so duman panmoria. Ipapanengneng to a say Prinsipe na Kareenan et si Jesu-Kristo. Sikato so mangitarok na sankamundoan a kareenan, ya aliwan diad panamegley na saray sagpot na sayan mapolitika tan relihyoso iran lider na mundo, noagta diad panamegley na Panarian na Dios. Saya a Panarian​—mangatatawen a gobierno na Dios​—so matalonan mamakasakey ed amin a matulok a katooan tan manumpal ed linawa na Dios a nagawa diad dalin.​—Isaias 9:6; Mateo 6:9, 10.