Nayari Kasin Magmaliw Kan Peteg a Maliket?

IBABANO nen George so balang sakey tekep na imis. Parad sikato, say bilay so mablin regalo a nepeg a panggayagaan. Say inka-maliket tan inka-positibo to so pakabidbiran a walna to​—anggan sanen sasagmaken to laray ot-ot na inkamasiken. Anggad agew na impatey to, kabkabat si George bilang maliket a too. Kasin maliket ka a singa si George? Kasin momoriaen mo so kada balon agew bilang regalo a nepeg a panggayagaan? Odino kasin agmakapaligsa odino makapaaburido ni ingen ed sika so panatalaran ed kada onsabin agew? Wala tay manasamsam na liket mo?

Say liket so naukeran bilang pagmaliw a masayaksak a relatibon permanenti. Napatnagan itan ed emosyon ya onnatnat manlapud inkakontento anggad pirmin gayaga tan ed natural a pilalek a mantultuloy a masayaksak. Peteg kasin wala so ontan a liket?

Natan, iyaalibansa na sosyedad so panmoria a magmaliw a maliket iray totoo no mayamyaman ira. Minilyon so mantalikarkar kalamor lapud bunek dan onyaman. Diad panggawa ed satan, dakel so mangisasakripisyo na personal iran siglaotan tan arum niran importantin bengatla ed bilay. Singa saray gilata ed ubong da, anggapoy tunda ran manapurasta, tan ngalngali anggapoy panaon da a manisip ed gagawaen da odino ed sakey tan sakey. Kanian, “ondarakel so bilang na totoo a naroromogan a nadedepres,” kuan na sakey a report diad Los Angeles Times, “tan manabeba so edad na manasagmak lay [depresyon] . . . Kakkaukolan iray sankasaliwan a tambal a pangontra ed pakadedepres.” Minilyon so maniinum na sebel iran druga odino sasalien dan pakepaen iray problema ra diad panagbartek. Arum so agnakontrol ed panaggastos sano nadedepres ira. Diad sakey a surbi, “ompapaway a saray bibii so onkiling a mansaliw lan mansaliw bilang pangipanggetan da,” inkuan na peryodiko na Britanya a The Guardian. “Sikaray mamitlon danay a singa met ed lalaki a mansaliw sano nadedepres ira.”

Balet, say tuan liket so agnaromog ed lakoan, boti, tableta, ringilya, odino deposito ed bangko. Ag-ilalako so liket; libre itan. Iner so pakaromogan tayo na ontan a mablin regalo? Singbaten tayo itan ed ontumbok ya artikulo.