Pibarangkaan Sumpad Inkaduka​—Ag-ontalonan Pibabakal?

NAIIMANO na saray turistan ombibisita ed United Nations diad New York City so Economic and Social Council Chamber, tekep na saray sankatangay a tubo tan pangisuksukan na saray wire diad kisame na publikon galerya na satan. Oniay impaliwawa na tour guide: “Say ‘agsinumpal’ a kisame so kaslakan a nanengneng bilang simbolo a mangipanonot a say kimey na United Nations nipaakar ed ekonomya tan sosyedad so agbalot nasumpal; lawas a walay nagawaan ni ta pian napaaligwas so kipapasey panagbilay na totoo ed mundo.”

Anggaman say Council so nitalaga parad makanepegan a pamaaligwas ed atagtagey ya estandarte na kabibilay parad amin, ompatnag a say kimey so agbalot mangangga. Makapainteres, legay ministeryo nen Jesu-Kristo ed dalin nen inmunan-siglo K.P., inkuanto: “Say espiritu na Katawan wala ed siak, ta nilanaan toak a mangipulong na saray maong a balita ed saray duruka.” (Lucas 4:18) Anto tay “maong a balita” ya inyabawag to? Mensahe itan nipaakar ed Panarian a si Jehova a Dios, a magmaliw a “sakey ya apireng na naukolan ed kairapan,” so mangiletneg ed si Jesu-Kristo bilang Ari. Anto so gawaen na satan a Panarian? Impropesiya nen Isaias: “Si Jehova na saray ehersito manggawa naani ed saray amin a baley na sakey a liket ed saray mataba a bengatla, sakey a liket na saray alak ed tapew na saray bolirek, saray mataba a bengatla a napno na utek, tan saray alak ed tapew na saray bolirek napaitneng ira. Inakmon to so patey ed ando lan ando; et say Katawan a Jehova punasen to naani so saray lua ya onagus ed saray amin a lupa.”​—Isaias 25:4-6, 8.

Labay mo ta a naamtaan so nagkalalo ni no panon a “napaaligwas [na Panarian na Dios] so kipapasey panagbilay na totoo ed mundo,” ta pian anggapo la so inkaduka? Nengnengen so walad leksab ta pian naamtaan mo no panon kan nabisita na sakey a kualipikadon managbangat a nagkalalon mangipanengneng ed sika no antoy ibabaga na Biblia ed saratan a pamaakaran.