No Panon Dan Natalindegan so Desdes na Saray Kalimog
SAY pilalek a naabobonan so mangiimpluensia ed dakel pian itunos so panag-isip tan saray kiwas da ed saray kalimog da. Nagkalalo lan kaukolan na saray kalangweran so biskeg pian resistian so makaderal iran agamil, a singa say panag-druga tan seksual ya imoralidad. Panon dan natalindegan so desdes na saray kalimog?
Onia so agano nin insulat na duaran tin-edyer a bibiin taga-Poland: “Mapatpatnag so espiritu na mundo ed limog na dakel a kaulop mi. Mansasakal ira ed saray eksamin da diad eskuelaan, mabanday so panagsalita ra, tan labalabay daray uson kawes ontan met ed maingal, imoral a musika. Agaylay liket mi lapud wala iray artikulo a parad sikami iran kalangweran tan manalimbeng ed sikami manlapud impluensia na ag-inkakontento tan rebelyoso iran tin-edyer!
“Agnasabsabaan so pisasalamat mi ed saray artikulo na Panag-Bantayan ya angipaslep ed sikami, a bilang kalangweran et nakakaukolan tan papablien kami. Natutulongan kami na saray simbawa na Biblia a suston niwanwan iray kurang mi pian mantultuloy a napaliket si Jehova a Dios. Kombinsido kami a say matoor a panaglingkor ed si Jehova so sankaabigan a dalan na bilay.”
On, natalindegan na saray kalangweran so desdes na saray kalimog. Diad pangipasal na saray Kristianon kalangweran ed “pakayari [ran] manebek,” naaralan day manggawa na makabat iran desisyon ya agmangipapatnag na “espiritu na mundo” noag ingen, “say espiritu a manlalapu ed Dios.”—Hebreos 5:14, NW; 1 Corinto 2:12.