Asingger Lay Inkasaksakey ed Relihyon? — Watchtower ONLINE YA LIBRARYA

Asingger Lay Inkasaksakey ed Relihyon?

“Naiimatonan tayo la so makatantandan agew diad awaran na saray relihyon tayo,” inkuan nen Christian Krause, presidenti na Lutheran World Federation. Ontan met, sinaglawi nen Pope John Paul II so “importantin ebento nipaakar ed mairap a dalan ed kipaalagey lamet na sigpot a pankakasakey ed limog na saray Kristiano.”

Sarayan entusiastikon proklamasyon so agawa lapud impamirma ed Official Common Statement nen Oktubre 31, 1999, diad Augsburg, Alemanya, ya amekder ed Joint Declaration on the Doctrine of Justification. Dugaruga so panaon tan lugar ya akagawaan. Nikuan a nen Oktubre 31, 1517, impasak nen Martin Luther iray 95 a theses to diad puerta na kastilyo a simbaan diad Wittenberg, diad ontan a nigapo so Protestantin Repormasyon. Siempre, diad Augsburg so angipresentaan na saray patumbok nen Luther nen 1530 ed manunan bangat da, say Augsburg Confession, ya impulisay na Iglesia Katolika, a sengegay agla makapanpulangan a siblangan ed baetan na Protestanismo tan Katolisismo.

Kasin say Joint Declaration so magmaliw ya importantin kundang diad panalona ed inkaapag na say iglesia, a singa nibaga ditan? Aliwan amin a partido so optimistiko. Masulok a 250 a teologon Protestanti so nampirma na kontran petisyon, a mamapasakbay ed pakakontrol ed sikara na Iglesia Katolika. Nasyosyodotan met iray Protestanti sanen inyabawag na Iglesia Katolika so sakey ya special indulgence parad taon 2000, say mismon agamil a sengegay balingaan, manga 500 taon lay apalabas. Tan lapud onkukurang ni so Augsburg Confession tan isusuppiat na Katoliko diad Konsilyo na Trent, arawin nagaway pankakasakey.

Say inkaapag-apag tan agpantutunosan ed loob na Kakristianoan so agnipetek ed pampirma na antokaman a deklarasyon na pankakasakey. Niarum ni, say pankakasakey diad pananisia so malet a nibase ed Salita na Dios, say Biblia. (Efeso 4:3-6) Imbes a say letnegan na pankakasakey et diad pikokompromiso, say tuan pankakasakey so nagegemtan panamegley na panaral tan panggawa ed kekerewen na Dios ed sikatayo. “Amin a baley manakar ira balang sakey ed ngaran na dios to,” so inyabawag na matoor a propetan si Miqueas, “et manakar itayo naani dia ed ngaran nen Jehova a Dios tayo ed ando lan ando lawas.”—Miqueas 4:5.

[Picture Credit Line ed pahina 32]