Kareenan ed Mundo​—Panon?

KASIN magano lan nadampot so kareenan ed mundo? Ontan so datin inisip na dakel balet ta natan et panduaruwaan da la. Unong ed sakey a report a manisingbat ed saray angat ed arapen tayo, ya impalapag na Daily Mail & Guardian na Abalaten ya Aprika, “saray palbeng nipaakar ed balon internasyonal a sistemay politika ya agawa ed apalabas labat a 10 taon so ompatnag ya agla nailaloan natan.”

Ipapabitar na saray autor so walan mailalon espiritu ed apalabas labat a dekada. Kasumsumpal labat ed saman na Cold War, tan anggapo met lay laslasan no siopay manunaan a bansa. Diad singano gapoan la na nikadkaduman balon peryodo, inilaloan na dakel ya onggapo lay katooan ed makatantandan iyaaligwas diad panresolbi na kairapan, sakit, tan saray problema ed kaliberliber. “Saraman a prediksion so ompatnag la natan ya agla nailaloan a kugkugip,” kuan na report. “Linmesa iray balon gotgotan ed saray lugar ya agtayon balot ni kabat, onloloor so sankamundoan a kairapan. Walay balon duara a bansan walaan na nuklear ya armas. Say reputasyon na NU so sigpot a kinmapuy lapud agto pakakaresolbi ed mantutumbokan a problema na too. Say kaslakan lan awawey et magmamaliw a sumpad utopia imbes di utopia.”

Amoria na saray estudyante na Biblia a saray sagpot na too, anggan panon lan karakep iratan, so agbalot ontalona. Akin ya andi? Lapud, singa ibabaga la na Biblia, “say sankamundoan mandukdukol ed kaugsan.” (1 Juan 5:19) Leleg a walad silong na pakayari nen Satanas, say mundo so agbalot magmaliw a Paraison kipapasen unong ed impamasla na Dios ed satan.

Ontan met, wala met so basiyan na pan-ilalo. Lapud isisipan nen Jehova a Dios so kitarok na kareenan ed mundo, aliwan diad pangapiger ed sayan sistema na bengabengatla, noagta diad pangitarok na “dalin a balo” a “panayaman na katunongan.” (2 Pedro 3:13) On, diad panamegley na Panarian na Dios, say mundo tayo so magmaliw a mareen, maliket ya ayaman, a ditan et say panagbilay tan pantrabaho so lawas panggayagaan na amin a matulok a katooan. Niarum ni, isisipan na Dios a “punasen ton amin a lua ed kamataan da; tan anggapo la naani ipatey, tan anggapo la naani onnangis o dageyem, o ot-ot ta saray una a bengatla sikara so linmabas la.” Agnibase irayan sipan ed agnapiho iran prediksion na totoo. Imbes, saratan so nibase’d seguradon Salita na Manamalsa, ya agmakapantila.​—Apocalipsis 21:4; Tito 1:2.