Saray Maabig a Gawa so Mangigloria ed Dios

PAMBABANIKELAN na saramay mangaaro ed Dios ya isindag so espiritual a liwawan manlalapud Salita to, say Biblia. Diad onian dalan et natutumbok da so ganggan nen Jesus: “Pasindagen yo so silew yo ed arap na saray totoo; pian nanengneng da so saray maong a gawa yo, et galgalangen da so Ama yo a wala ed tawen.” (Mateo 5:16) Say panagsalita tan maptek a kondukta so makapangigloria ed Dios.

Panggugunaetan na Tastasi nen Jehova a paliketen so Dios diad ikiwas a mitunosan ed Biblia tan diad pambabanikel dan tulongay arum ed espiritual a paraan. Gagawaen da itan anggan diad daldalin ya agni legal a nirehistro so mapublikon ministeryo ra. Diad sakey a kabiseran syudad na sarayan bansa et ginawa la na Tastasi nen Jehova ditan iray tinaon a kombension ya inatendian na manga 6,000 ya anggad 9,000 a totoo. Nisesengeg ed saratan a pandaragup et angabang ira na saray hall ya uusaren parad saray exhibition. Singa ed apalabas iran taon, sakbay iran nankombension nen 1999, nilasus a Tastasi so amasyan nanlinis ed saray pasilidad tan inlira da iray sound system tan nilibon yurongan.

Amin na sayan panagparaan so naimano. Naobserbaan na saray administrador ed pasilidad irayan impantrabaho. Naimano ra met ya anggaman say pantok ya inmatendi et 15,666, amin so agawan maab-abig tan saray Tastasi so walaan na uksoy. Nandinayewan met na saray empleado so impasyan impanlinis kayari na kombension.

Nisesengeg ed saya, impanengneng na administrasyon so apresasyon da diad impangiyuna ed saray Tastasi ed listaan ta pian sikaray unonan mangupa ed bilding diad ontumbok a taon. Balet ta wala ni so ginawa na administrasyon. Nen Hulyo 15, 1999, inikdan da so kombension komite na award of appreciation. Oniaran salita so niukit ed plake “say kongregasyon na Tastasi nen Jehova”​—bengatlan ag-inilaloan ed bansan mamepeget ed say edukasyonal a kimey da nipaakar ed Biblia.

Diad intiron mundo diad taon 2000/2001, minilyon so iilaloan ya onatendi ed nilasus a “Mananumpal na Salitay Dios” iran Distriton Kombension na Tastasi nen Jehova. Diad iyatendim et personal mon naobserbaan no panon a saramay masimoon a manusumpal ed ibabaga na Biblia et manggagawa na saray maabig a gawa a mangigloria ed Dios.