Siopa so Mamaandi ed Karawalan?

NEN Setyembre 1999, inabrasa na Secretary-General na NU a si Kofi Annan iray delegado parad koma-54 a tinaon a sesyon na General Assembly. Singa nibalita la ed The Toronto Star, inangat toray lider ed mundo, diad impangikuan: “Dakel a totoo so mankakaukolan na mas ni nen say panangibalikas labat na panangabagey manlapud arum a bansa. Say nakakaukolan da et say peteg tan manbayag a paknaan pian tulongan ira ed kaandi na agmanundan karawalan, tan iyakar ira ed maligen a dalan a mamaarap ed aligwas.”

Kasin nitarok na NU tan saray kabiangan a nasyon so “peteg tan manbayag a paknaan” a nakakaukolan ed pamaandi na karawalan? Diad parehon balita na Star, oniay inkuan nen Presidenti Bill Clinton na E.U.: “Kayari na dakel a panagpaagus na dala ed sayan siglo, kabat tayon mainomay so pangibagan ‘aglan balot naulit,’ balet ta alay irap itan a gawaen.” Intuloy to ni: “Say alablabas a panagsipan et aliling toy inkaruksa a singano anggapo lay pibabali.”

Masulok a 2,500 a taon ed apalabas, oniay inkuan nen propetan Jeremias nipaakar ed saray sagpot na too: “O Jehova, amtak a say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.” (Jeremias 10:23) Anto sirin so walan ilalo parad kaandi na karawalan?

Singa nabasa tayo ed Isaias 60:18, inter na Dios so panamaseguro: “Say panamasoot [“karawalan,” NW] agla naani narengelan ed dalin mo, say kabagbag tan kageba agla naani narengelan ed saray ketegan mo.” Inmunan asumpal itan a propesiya sanen pinapawil na Dios so nibantak a totoo to diad binalegan dan dalin. Walaan met itan na babaleg a kasumpalan a napanggayagaan tayo. Si Jehova a Dios et ‘ag-alablabas a mangisisipan.’ Bilang say Sankatagyan tan Manamalsa na katooan, sikato so walad sankaabigan a posisyon a mangekal ed “agmanundan karawalan.” Diad silong na Panarian na Dios et ontalona so kareenan. Naandi la so karawalan ed ando lan ando!​—Daniel 2:44.