Pansiansian Matoor ed si Jehova

ANGGAMAN say katooran et mataltalag lan ugali natan, napatnagan itan a kualidad ed saray lingkor na tuan Dios a Jehova. Say matoor a too et mansiansian agnagiing anggano walaray pakasubokan tan lalon determinado diad ilalabas na panaon. Konsideraen pa so maong ya Arin Ezekias. Oniay kuan na Biblia nipaakar ed sikato: “Kayari to anggapo so singa sikato ed saray amin ya arari ed Juda, nisay dia ed saray inmuna nen sikato.” Antoy nanggawa’d si Ezekias a nikadkaduma? Sikato so “pinmeket ed si Jehova,” anggano sikato so aliber na saray managdayew ed palson dios a si Molec. On, si Ezekias so “agpinmaliis a manlapu ed itutumbok ed [si Jehova], noag ingen inunor to so saray ganggan to.”​—2 Arari 18:1-6.

Si apostol Pablo so sakey nin toon nansiansian matoor ed si Jehova. Say rekord na ministeryo to so naromog ed Kristianon Griegon Kasulatan a pakapatnagan a tuloy ed impantultuloy nen Pablo diad sigpot-kamarerwan serbisyo ed Dios. Diad pansamposampot lay bilay to diad dalin, sarag nen Pablo a nibaga so onia nipaakar ed inkasikato: “Akibakal ak ed maabig a pibabakal, asumpal ko so binati’ko, inunor ko so pananisia.”​—2 Timoteo 4:7.

Agaylan maabig ya alimbawa ira di Ezekias tan Pablo ed sikatayo no nipaakar ed katooran! Komon ta aligen tayo so pananisia ra diad pansiansia tayon matoor ed Engranden Dios tayo, si Jehova.​—Hebreos 13:7.