“Liberen Ko so Altar Mo, O Jehova”

“URASAN ko so limalimak ed kaandian na kasalanan: dia ed satan liberen ko so altar mo, O Jehova.” (Salmo 26:6) Inyabawag nen Arin David nensaman so debosyon to ed si Jehova ed ontan iran salita. Balet, akin a “liberen” toy altar nen Jehova, tan diad anton pantalos?

Parad si David, say sentro na panagdayewan ed si Jehova et diad tabernakulo tekep na nauklopan na gansa ya altar na panagbagatan na satan, a legan na uley to et naromog ed Gabaon, diad amianen na Jerusalem. (1 Arari 3:4) Say altar et ngalngali pitoran pie labat a kuadrado, memelag a tuloy nen say abalbaleg ya altar ya ipaalagey ed lolooban na templo nen Solomon.a Anggaman ontan, aromog nen David so baleg a liket diad tabernakulo pati lay altar na satan, a satan so sentro na puron panagdayewan ed Israel.​—Salmo 26:8.

Saray popoolan a bagat, komunion iran bagat, tan saray apay parad kasalanan so imbagat diad altar, tan say tinaon ya Agew na Pananakbong et walay kabiangan ton bagbagat ya inyapay ed biang na nasyon. Say altar tan saray bagat so walaan na kabaliksan parad saray Kristiano natan. Impaliwawa nen apostol Pablo a say altar et irerepresenta toy linawa na Dios, unong ed satan et inawat Toy matukoy a bagat parad karondon na katooan. Inkuan nen Pablo: “Dia ed sayan linawa apasantos kami lapud inkisaklang na laman nen Jesu-Kristo ya agawan aminpinsan.”​—Hebreos 10:5-10.

Sano manlingkor la diad altar iray saserdote, kaugalian dan urasan so kalimaan da pian malinis ira. Matukotukoy sirin, inurasan nen Arin David iray lima to “ed kaandian na kasalanan” sakbay ‘a manakar ed liber na altar.’ Sikatoy kinmiwas “dia ed katooran ed puso, tan dia ed inkatunong.” (1 Arari 9:4) No agto inurasan iray lima to ed onian paraan, say panagdayew to​—say ‘iliber to ed altar’​—et agkomon inawat. Siempre, aliwan sakey a Levita si David tan ag-awalaan na pribilihyon manserbi ed altar bilang kimey na saserdote. Anggaman sakey ya ari, sikato ingen so agnaabuloyan ya onloob ed saban na tabernakulo. Siansia, bilang matoor ya Israelita, tinulok to so Mosaikon Ganggan tan maparanay ya angiyapay diad altar. Sikatoy nanakar ed liber na altar diad pantalos ya insentro toy bilay to ed puron panagdayew.

Kasin nayarian tayon aligen natan so ehemplo nen David? On. Nayarian tayon urasan so kalimaan tayo ed kaandi-kasalanan tan manakar ed liber na altar na Dios no agamilen tayo so pananisia ed bagat nen Jesus tan, ‘malinis itayo ed limalima tan maralus ed puso,’ ya intiron-puson manlingkor ed si Jehova.​—Salmo 24:4.

[Paimano ed leksab]

[Litrato ed pahina 23]

Say altar dia so angilitrato ed linawa nen Jehova, a ditan et aawaten to so dugan bagat parad karondon na katooan