Say Panangiter a Mabmabli ed Imaton nen Jehova

Say onggendan a sulat so naawat na sangan opisina na Tastasi nen Jehova diad Mozambique:

“Sakey ak ya ugaw a lakin mantaon na pitora tan wala ak ni ed elementarya. Labay kon ipawit iyan kuarta a nalmoan ko’d impamabaleg na sakey a siwsiw. Alakok itan ed kantidad a 12,000 Meticais [$1, E.U.]. Misalamat ak ed si Jehova ta pinabaleg toy sankaunaan a siwsiw a kinomponik tan nagmaliw a lalong. Labay kon say regalok et usaren yo parad kimey nipaakar ed Panarian nen Jehova.

“PS: Tinulongan ak nen tatay kon isulat iya.”

Walaray totoon isisiglaot day inkabunlok ed saramay walaay sulok da ed materyal. Balet, sano basaen tayo so salaysay na Biblia nipaakar ed balo ya angipelag ed kaban na kayamanan na “duaran maravilis,” natalosan tayon say inkabunlok so nasukat, aliwan unong ed kantidad, noagta unong ed suston inklinasyon na puso.​—Lucas 21:1-4.

Apresiaen nen Jehova so antokaman a regalon manlalapud puson apakiwas lapud aro, anggan panon lan kamelag itan. Tan mayamyaman ton bebendisionan iramay mabunlok a singa sikato diad pangiiter da na panaon, biskeg, odino materyal a kaykayarian da nisesengeg ed Panarian to.​—Mateo 6:33; Hebreos 6:10.