Panoy Pannonot nen Jehova ed Sika?
“NONOTEN moak O Dios ko.” Aminpigan akikasi si Nehemias ed Dios ed ontan iran salita. (Nehemias 5:19; 13:14, 31) Natural labat a sano makakasagmak so totoo na gonigon, sikaray ontupleg ed Dios tekep na saray ey-ey a singa satan.
Balet, antoy walad kanonotan na totoo sano kerewen da ed Dios a nonoten to ira? Malinew, iilaloan dan mas ni so gawaen na Dios ed sikara nen say basta labat tandaan toy kangaranan da. Maseguron mipadpara so paniilalo da met a singa ed impanilalo na sakey ed saray kriminal a pinatey ed dikingan nen Jesus. Sayan sakey, aliwan singa samay sananey, so akikasi ed si Jesus: “Nonot moak sano onsabi ka ed panarian mo.” Kaliktan ton sikatoy aglambengat nonoten nen Jesus noagta manggawa met na bengatla parad sikato—a sikatoy paolien to.—Lucas 23:42.
Mitunosan, ipapanengneng na Biblia a dia ed Dios, say ‘pannonot’ et kabaliksan toy panggawa na positibon kiwas. Alimbawa, kayarin say dalin so adelap ed loob na 150 agew, “Ninonot na Dios si Noe, . . . et say Dios pinasiplog to so sakey a dagem ed tapew na dalin, et saray danudanum kinmati’ra.” (Genesis 8:1) Pigaran siglo ed saginonor, impikasi nen Samson, a binulag tan inggolonggolong na saray Filisteo: “O Katawan a Jehova, nonoten moak, pikasik ed sika, tan pabiskeg moak, pikasik ed sika, natan lambengat a maminsan.” Ninodnonot nen Jehova si Samson diad impangiter to’d sikato na labas nen say too a biskeg ta pian makabales sumpad kakabusol na Dios. (Uko-ukom 16:28-30) Parad si Nehemias, benendisionan nen Jehova iray sagpot to, tan nipawil ed Jerusalem so tuan panagdayew.
“Saray bengatla a nisulsulat nensaman, nisulat ira ya onkana ed kibangat tayo, ta pian lapu ed anos tan lapu ed panamaligliwa na saray Sulsulat, wala so ilalo tayo,” insulat nen apostol Pablo. (Roma 15:4) No nodnonoten tayoy Jehova diad panggunaet tayon gawaen so linawa to, a singa ginawa na saray matoor a lingkor to nensaman, makapanmatalek itayon nodnonoten itayo met nen Jehova diad panulong to ed sikatayon nagamoran iray inagew-agew a pankaukolan tayo, diad panulong to’d sikatayo no nasusubok itayo, tan diad pangiliktar to ed sikatayo sano itarok toy panangukom ed saray agmaridios.—Mateo 6:33; 2 Pedro 2:9.