Nipaliwawa so Libron Daniel!
MAGUNAET iray inmatendi ed kombension a makala na kopya ra parad balon paway a 320-pahinan libron Pay Attention to Daniel’s Prophecy! Antoy liknaan da nipaakar ed sayan libro? Konsideraen so imbaga na pigara.
“Singa ed maslak a tin-edyer, agko paninteresan so panaral ed kadaanan ya awaran. Kanian sanen naawat koy personal a kopyak a balon libron, Pay Attention to Daniel’s Prophecy! singa anggapoy interes kon basaen itan, balet ta sinalik. Et talagan alingo-lingo ak! Saya so sakey ed sankaabigan iran libron abasak ed kapiganman. Peteg a makapainteres! Agko naliliknan manbabasa ak na sakey a salaysay ya agawa nilibon taon lay apalabas. Diad unonan pankanawnawa, aliknak a nayarian kon ipasen so inkasiak ed kipapasen nen Daniel. Talagan nilitratok ed kanonotan ko no antoy kipapasen sano niyarawi manlapud pamilyam, nibaki ed sananey a bansa, tan paulit-ulit a nasubok so integridad mo. Salamat na baleg lapud sayan libro.”—Anya.
“Say tinmulong ed siak a maong et say malinew a mensahe a sigpot a kokontrolen nen Jehova iray pamaakaran a mangaapekta ed totoo to. Diad panamegley na saray pasingawey tan kugkugip nen Daniel tan ed saramay arum ya impatalos to, mabitar a say Dios tayo so lawas mangimaneobra ed saray ebento unong ed angigagalaan to. Saya so mamapabiskeg ed ilalo tayo ed mapropetiko iran panangilitrato a naromog ed Biblia nipaakar ed balon mundo a gawaen to.”—Chester.
“Labalabay ko so paraan ya impanggawa yon mabilabilay si Daniel. Sikatoy lalon akabkabat ko diad paraan ya impangipabitar yo ed saray panangiyansakit tan kapagaan to. Lalon atalosan ko no akin ya aromogan nen Jehova a sikatoy makaroyroyo. Diad saray amin a subsubok tan inkapasegsegang to, sikatoy agmapaga ed inkasikato. Say manunan papagaan to et diad si Jehova tan say masanting a ngaran To. Salamat ed impangipabitar yo ed sarayan punto.”—Joy.
“Saya so abayag tayo lan aalagaren! Anggapo nin balot nensaman so nipaimano no kaunongan ed libro na Daniel so talagan onaaplika ed balang sakey ed sikatayo. Kayari impakabasak ed dakel a kabiangan na balon libro ed samay labin impakawalaan ko ed satan, tinmunda ak tan akisalamat ak ed si Jehova diad pikakasi.”—Mark.
“Say agmi inilaloan et say epekto na satan ed ananak mi. Mantaon ira na limara tan talora. . . . Anggaman saray istorya nipaakar ed di Daniel, Ananias, Misael, tan Asarias so lawas lan paborito ra ed libron My Book of Bible Stories, say inkisalaysay ed libron Daniel’s Prophecy so angapekta ed sikara ed paraan ya agmi inilaloan. Anggaman ugugaw nira, ompatnag a sarag dan nibiig irayan kalangweran a lalaki. Alay abig iran napanuliranan parad ananak mi! Agaylan makapakelkelaw ya usaren so intarya yo ed sikami! Salamat, salamat na balbaleg!”—Bethel.
“Liknaen kon wala ak a mismo ed limog na saraman a Hebreon kalangweran a lalaki legan a nasusubok so pananisia ra; tan satan so akapasesegan kon usisaen so dilin pananisiak. Say kahon parad repaso ya apauloan na “What Did You Discern?” so mangipupurek ed lugan na kapitulo. Salamat lamet ed sayan sakey ya alay abig a libro.”—Lydia.