Sano ‘say Dagem so Sumpa ed Sikatayo’

Diad paneskribe ed aktual ya eksperiensia na saray babangatan nen Jesus diad impipuligesgesan dan nabeltang so Dayat na Galilea ed sakey a baloto, kuan na managsulat ed Ebanghelyo a si Marcos a sikaray “nasasagpotan a mangagaor, ta say dagem sumpa ed sikara.” Bangta wala ni ed gilig na dayat, naimano la nen Jesus so kipapasen da kanian sikatoy mamilagron nanakar ed dayat pian nasabi to ira. Sanen sikatoy sinmapat ed kawalaan dan baloto et tinmunda so dagem.​—Marcos 6:48-51.

Inreport na parehon managsulat na Biblia a diad asasakbay ya inkagawa et “inmalagey so sakey a baleg a bagyo na dagem.” Diad saman et “binano [nen Jesus] so dagem, . . . Et say dagem tinmunda, tan agawa so baleg a linak.”​—Marcos 4:37-39.

Anggaman ag-itayo apribilihyoan natan a napamintuan so ontan iran mamilagron ebento, dakel so naaralan tayo manlapud saratan. Bilang ag-ayadyarin totoo a manbibilay ed mapeligron panaon, ag-itayo nipuera ed saray dagem na kairapan. (2 Timoteo 3:1-5) Diad tua, no maminsan et nayarin liknaen tayon say gonigon a nisisiglaot ed saray personal a subok et magmaliw a singa kakasil na bagyo. Balet walay inawa! Ta iimbitaan itayo nen Jesus: “Dago kayo’d siak, amin yon nasasagpotan tan nabebelatan, et itdan ta kayoy pampainawa.”​—Mateo 11:28.

Sano ompapatnag a say ‘dagem et sumpa ed sikatayo,’ naeksperiensia tayo so “baleg a linak” ed puso. Panon? Diad panmatalek ed agnamintis a sipasipan nen Jehova a Dios.​—Ikompara so Isaias 55:9-11; Filipos 4:5-7.