Pangarap ed Saray Angat na Inkaateng

SAY pamabaleg ed ananak natan, nagkalalo la ed saramay walad inkatin-edyer, so abalbaleg ya angat parad atateng. Imbalita na The Gazette na Montreal, Canada, a magmamaliw a “normal ed saray katayatdang” so pan-eeskperimento ed alkohol tan saray druga. Idadanet na satan a saray atateng so walaan na “responsabilidad a magmaliw a malikas nipaakar ed saray pananguman ed walna na saray tin-edyer [da].”

Antoy nepeg ya imanoen na atateng a nayarin pakapatnagan da ed ontan iran problema na katayatdang? Walaray pisikal, emosyonal, tan sosyal a pakalikasan ya apatnagan na say American Academy of Child and Adolescent Psychiatry a mangilalanor ed naynay a kababanalan, pananguman ed personalidad tan ugali, pankulong ed kuarto, inkapangetpanget, tan say panggaway kontra ed ley.

Panon a nasalimbengan na atateng iray ananak da manlapud ontan a makapasakit a paneksperimento tan say aliwliwa iran pansumpalan na saratan? Sisiaen nen Dr. Jeffrey L. Derevensky, na McGill University, a say lukas a komunikasyon tan pamayubo ed panrespetoan ed balang sakey legan na saray taon ya ibabaleg na ugaw so nayarin mamaraiset ed saray problema ed saginonor. Inyarum na The Gazette ya anggaman ed pilalek parad lalon inka-independenti ya onlesa legan na inkatayatdang, saray tin-edyer so mantultuloy a mankaukolan na “panangigiya, suporta, pananontonan tan aro ya itarya na atateng da.” Sarayan komento so mangiyaaniweng ed proverbio na Biblia a mangibabagan: “Ibangat mo so anak ed dalan a nepeg to a laen, tan anggan sano masiken la ag-onarawi ed sikato.” (Uliran 22:6) Sisimbawaen na Dios iray atateng a magmaliw ya ehemplo, kaulop, mitatalosan, tan managbangat.​—Deuteronomio 6:6, 7.