Report na Saray Manangiyabawag na Panarian
Teokratikon Ilalaknab Diad Namibia
SAY maong a balita na Panarian na Dios so pilimeron akasabi ed Namibia ed banda’d saginonor na dekaday 1920. Nanlapulad satan a panaon, nilasus a matuan impanpuson totoo so kinmiwas ed mensahe na Dios nipaakar ed kilalaban. Saray onggendan ya eksperiensia so mangipanengneng no panon a titiponen nen Jehova irayan makaparoyroyon totoo ed kasimpukokan to.—Aggeo 2:7.
◻ Si Paulus, sakey a makulin dumaralos a manaayam ed amianen-bukig na Namibia, so pilimeron akatongtong na Tastasi nen Jehova sanen sikatoy binmisita ed Windhoek, say kabiseran syudad. Kombinsidon tampol si Paulus ya aromog to lay katuaan. Sikatoy sinmempet a walaan na libron Makapambilay Kayo na Ando lan Ando ed Paraiso diad Dalin. Insan, diad sakey a biahe a mamaarap ed Rundu, say sankaasinggeran a baley a kawalaan na Kingdom Hall, aromog nen Paulus iray Tastasi tan akikasin bisitaen da.
Balet, arawdawin maong so panaayaman nen Paulus pian laen na Tastasi tan ikonduktaan na sinimban panagaral na Biblia. Ag-adismaya, ginapoan nen Paulus ya aralen so Biblia a bukor. Niarum ni, sikatoy maseseg ya angipulong ed arum nipaakar ed saray bengatlan nanaaralan to. Asabi panaon, aporma so sakey a grupon manaaral na Biblia. Sanen nadngel na saman a melag a grupo ed radyo a walay nagawan asamblea na Tastasi nen Jehova diad Rundu, impanaaruman day daiset a naalmo ra tan inyareglo day luganan pian onatendi.
Agaylan makapaliket ya eskperiensia iman parad sikara pian milimog ed Tastasi nen Jehova ed unonan pankanawnawa! Ag-abayag et inyuksoy iray kualipikadon agagin lalaki pian maparanay a bisitaen iyan grupo. Natan, wala lay anemiran manangipalapag ed baryo a panaayaman nen Paulus.
◻ Ginmapon nainteresan si Johanna ed ngaran na Dios sanen walay nadngel ton mamapabanday ed Tastasi nen Jehova. Onia so nanonotan to ni: “Sanen pilpilimeron nadngel koy ngaran a Jehova, agko la nalingwanan itan, tan nanumamengan ko no siopa si Jehova. Manaayam kami nen masiken ko ed asingger ed Walvis Bay diad baybay na Namibia. Diad sakey ya inkagawa linma kami ed baley, tan anengneng koy pigaran Tastasi a mangibubunog na Panag-Bantayan a magasin ed karsada. Angala ak na sakey a kopya tan papaiyaralan ak na Biblia, lapud dakel iray tepet ko. Akanangis ak sanen pinasantabian da ak ya ag-ira natuloy a makaonla lapud aderal so luluganan da. Ag-abayag kayari na saman et inatey si masiken ko, tan nanayam ak ed Keetmanshoop. Sakey ya espisyal payunir (sigpot-panaon ya ebanghelisador) so niasain a mankimey diman, tan akala ak ed sikato na libron Say Katuaan a Mangitonton ed Bilay ya Andi Anggaan. Diad kagapo, amoriak so tanol na katuaan.
“Diad kaunoran, naimbitaan ak a mibiang ed panagpulong, balet tinmalaw ak lapud takot ed too. Legan a manaakar kami ed kabkaabungan, nampikasi ak ed si Jehova ya abuloyan toak lan ompatey nen say panpulongen toak. Sanen pilpilimerok so akibiang ed panagpulong diad karsada, onsasanib ak ed iskinita, diad ilalon anggapo komoy makanengneng ed siak. Diad kaunoran, akapanpakpel ak lan mangiyopresi na magasin ed sakey ya ondadalan, tan diad saman ko labat agawaan so mitongtong. Diad saman ya agew, tekep na tulong nen Jehova, innabang koy nibase ed Biblian ilalok ed dakel a totoo.
“Natan, 12 taon ed saginonor, anggaman pobri ak, siansian papablien koy pribilihyon panagpayunir tan mantutultuloy ak a makakagamor na agnasabaan a liket lapud pananginabang na katuaan ed arum nipaakar ed Panarian.”