Kasin Makatulong ed Sikatayo Natan so Biblia?

“NO moriaen so Biblia bilang intiraminti, manga 1 porsiento labat so makabaliksan a basaen, balet say arum la so agmakabaliksan tan kadaanan la.” Ontan so inkuan na sakey a kalangweran a laki. Dakel so onabobon ed sikato. Anggaman mantutultuloy a sankasaliwan so Biblia ed sankamundoan, minilyon so agtanton mangiimano ed satan tan agmikabisado ed saray bangat to.

Diad 1996 ya edisyon to nipaakar ed Krismas, inkomento na peryodiko na Aleman a Süddeutsche Zeitung ya “ondaraiset lan ondaraiset so manbabasa” ed Biblia. Diad panaon na saray siensia tan ondaraak a babasaen ed sekular, saray salaysay ed Biblia so ompatnag ed dakel bilang dumaruma tan mairap a talosan.” Pekderan na saray surbi iyan report. Ipaparungtal na pigaran impanaral a baleg a bilang na ugugaw so ag-anggan eksakton makaamta no siopa si Jesus. Diad sakey a surbi, kulang nin kapaldua na nainterbion totoo so makapangisalaysay ed saray istorya ed Biblia nipaakar ed managdarak ya anak tan say makaaron Samaritano.

Say palapagan na Swiss Evangelical Church a Reformiertes Forum so angikuan a diad Switzerland, say pankaukolan parad Biblia et aliwan singa say dati. Anggan diad saramay walaan na Biblia, mabetbet a nararabok labat itan ed salansanay libro. Diad Britanya et mipadpara so kipapasen. Unong ed sakey a surbi, anggaman maslak a totoo so walaay kopya na Biblia, say baleg a bilang so agnin balot akabasa ed satan.

Diad biek a dapag, dumay panmoria na minilyon ed sankamundoan nipaakar ed Biblia. Momoriaen da itan bilang Salita na Dios tan ipapasen da itan a walay kablian tan makagungguna. Kanian, regular dan babasaen itan. Onia so insulat na sakey a kalangweran a bii: “Panggugunaetan koy manbasa na sakey odino duaran kapitulo na Biblia kada agew. Panggagayagaan ko itan a maong.” Saratan ya indibidual so mangiimanon maong ed ibabangat na Biblia, tan panggugunaetan dan iyaplikay simbawa to ed kabibilay da. Sisiaen dan say Biblia so makatulong ed sikatayo ed magulon mundo natan.

Antoy opinyon mo? Kasin agmakabaliksan so Biblia ed modernon panaon? Odino walaan itan na kablian tan makagungguna? Kasin makatulong ed sikara natan so Biblia?