“Sakey a Mabiskeg a Walnan Pinakiwas na Pananisia”

IPAWAY nen taon 1998 so pandinayewan a maong a balon libro ya atituloan ed Pranses a Les Témoins de Jéhovah face à Hitler (Saray Tastasi nen Jehova dia ed Arap nen Hitler), ya insulat nen Guy Canonici. Diad paunan-salita to ed libro, insulat na respetadon tuloy a manag-awaran a Pranses a si François Bédarida: “Agusgustoan iyan libro. Aliwa labat a lapud itarya to so kulang, noagta lapud nipanpanaon itan. . . . Likud ed saray espesyalista, siopa ni so makaamta ed mauges a nansumpalan na Tastasi nen Jehova ed silong na Third Reich? Ingen, diad intiron 12-taon ya uley, asagmakan day panamasegsegang tekep lay agmanundan karamsakan tan karawalan. Asagmak da met so makapakebbiew a kipapasen ed saray panangipangawan a kampo. Apabpairap met ira lapud pananisia tan kombiksion da. Akin kasi et alingwanan na awaran irayan Kristiano? . . .

Akin a walay ontanlan karamsak tan sistematikon panamasegsegang ed daiset, nikaykayat, tan agmapeligron sekta? Saya so makanan punto ed makapawetwet ya inkagawa. Aliwa labat a niparungtal iray Tastasi ed Alemanya bilang daiset lambengat a kabiangan na populasyon​—ya ipapanengneng na estadistika ya onliligada’d 20,000 a dagup ed masulok a 60 milyon a manaayam​—balet ta amin da et mareen a mibabaley a manrerespeto ed ley tan agmanesesga ed arum, noagta malabay labat a mankimey tan mamabaleg ed ananak da ed suston paraan. . . .

“Nipaarap iyan panamasegsegang sumpad say mabiskeg tan mananalon espiritual a pilalaban na saray mananisia a makayarin manaeg ed puersa na akinpaway iran desdes diad panamegley na akindalem a puersa na pananisia ra ed si Jesu-Kristo, a ginmapo ed panagduksa na polisya na Estado​—ya anggad punto na heroismo tan inkamartir.”

Sakey a mabiskeg a pamatnagan so istorya na Tastasi nen Jehova ya anagmak bilang martir lapud Makristianon pananisia ra diad arap na panameget ed relihyon. Dia ed panrepaso ed libro to, makatenyeg ya inyarum na manunan Katolikon peryodiko a Pranses, a La Croix: “Lapud agtanton kabat ya awaran da, impantetekep nen Guy Canonici so amayamay a paneknek ya agpakaskaselan na sakey diad pakanengneng to ed sakey a mabiskeg a walnan pinakiwas na pananisia a nibalikas ed sankasimplian a paraan, pananisia ya agnabuyak anggad anggaan anggan diad limog na saray ugugaw. Sayan pakanodnonotan so nepeg a mangiter na pakatalos ed say kaplesan a debati nipaakar ed Kristianon kipapasen na Tastasi nen Jehova.”