‘Tinakotan Da so Tuan Dios’

LEGAN a walad inkaaripen iray Israelita ed Ehipto, saray manamianak a Hebreo a di Sefora tan Pua so niiyan ed alay irap a kipapasen. Diad panasalin kontrolen so maples ya idarakel na dayon populasyon, ginanggan nen Faraon irayan bibii: “Bangno manamianak kayo ed saray Hebreas . . . , no laki so anak pateyen yo.”​—Exodo 1:15, 16.

Di Sefora tan Pua so ‘tinmakot ed tuan Dios,’ kanian sikaray nampakpel ya “agda ginawa so unong na imbilin na ari’ Ehipto ed sikara.” Imbes, inliktar da iray lalakin kapangiyanak, anggaman sayan makpel a talindeg et kipeligroan da. “Ginawa [nen Jehova] so maabig ed saray manamianak,” tan tinumangan to ira lapud manangiliktar-bilay iran ginawa ra.​—Exodo 1:17-21.

Sayan salaysay so mangidadanet ed panamabli nen Jehova ed saramay manlilingkor ed sikato. Anggaman makpel so ginawa di Sefora tan Pua, nayari to komon labat a moriaen so ginawa ra bilang maabig a gawa ed kaparan too. Diad tua, anggapoy bii a limpioy nonot to so mamatey ed saray kapangiyanak! Anggaman ontan, andi-duaruwan kinonsidera nen Jehova so katuaan ya arum a totoo, lapud takot ed too, et akagawa na mauges iran gawa. Amta to a sarayan manamianak so pinakiwas na aliwa lambengat ya inkamapangasi ed too noagta maridios a takot tan debosyon.

Agaylay pisalsalamat tayon manlingkor ed Dios a mangiimano ed matoor iran gawa tayo! Tua, anganko et anggapo ed sikatayo so nidunget ed subok na pananisia ya inkipaarapan di Sefora tan Pua. Ingen, sano ontalindeg itayon malet ed no antoy duga​—balanglan diad eskuelaan, diad pantratrabahoan tayo, odino ed dinanman ya arum a situasyon​—ag-ibabaliwala nen Jehova so matoor a pangaaro tayo ed sikato. Diad pisunian, sikatoy “mananumang ed saray mananap ed sikato.” (Hebreos 11:6) On, “say Dios aliwan agmatunong pian nalingwanan to so gawa yo tan say aro ya impanengneng yo ed ngaran to, ed impanulong yo ed saray sasanto ed saray pankaukolan da, tan ed panutulong yo ni natan ed sikara.”​—Hebreos 6:10.