“Sano Ontabang Lay Asin”

NAMBABAKALAN la itan. Inusar itan a pansaliw. Diad kadaanan a Tsina et onkokomadua labat so balor na satan ed balitok. On, say asin so abayag lan ipapasen na katooan bilang makanakanan produkto. Anggad natan et uusaren itan ed panagtambal tan panagdisimpekta, tan satan so uusaren diad intiron globo bilang panagpananam tan panagpreserba.

Lapud amayamay a kalkaliktan a kualidad tan pakausaran na asin, agmakapasurprisa so impangusar na Biblia ed satan diad piguratibon paraan. Alimbawa, diad Mosaikon Ganggan et kinaukolan ya asinan so antokaman ya iyapay ed altar parad si Jehova. (Levitico 2:13) Ag-iya ginawa pian pananamen iray bagat, noagta nayarin lapud inrepresenta na asin so agpakabulok odino agpakaderal.

Diad bantog a Sermon to ed Palandey, oniay inkuan nen Jesu-Kristo ed saray patumbok to: “Sikayo so asin na dalin.” (Mateo 5:13) Lapud saya, impabitar nen Jesus a say panagpulong da ed arum nipaakar ed Panarian na Dios et posiblin kipreserbaan, odino kisalbaay-bilay na saray ondengel ed sikara. On, saramay mangiyaaplika ed saray salita nen Jesus so naprotektaan manlapud saray moral tan espiritual a kabubulok ed saray komunidad a pambibilayan tan pankikimeyan da.​—1 Pedro 4:1-3.

Balet, intuloy nen Jesus ya impasakbay: “Balet no say asin ontabang, . . . Anggapo la so mogmo a kakanaan to, no ag-ibantak ed paway tan gatin-gatinan na saray totoo.” Diad impankomento to ed saya, inkuan na iskolar na Biblia a si Albert Barnes a say asin a kabisado nen Jesus tan saray apostol to et “marutak, alaokay bengatlan nanlapud tanaman tan dalin.” Kanian sano ontabang lay asin, nayarin walaray natilak a “dakel a bengatlan nanlapud dalin.” Inkuan nen Barnes ya, “anggapo lay kakanaan na saya nilikud ed . . . pantabon dia ed saray basbas, odino dadalanan, a singa panguusar tayo ed buer.”

Diad italineng ed sayan pasakbay, nepeg a manalwar iray Kristiano ya ag-ira ontutunda ed panpupulong da ed publiko odino ompawil ed agmaridios iran klase na kondukta. Ta no andi et onletey ira ed espiritual a paraan tan anggapo lay kakanaan da, singa ‘asin a tinmabang la.’