Rasismo tan Relihyon

SANEN sinmabi ak ed E.U. nen 1978, sinisiak ya abayag lan aresolbi na Amerika iray problema to nipaakar ed rasa, a saray andeket et kaparan lan mibabaley,” inkuan nen Mark Mathabane, sakey ya autor a nianak ed Abalaten ya Aprika, diad sakey ya interbio na magasin a Time. “Diad dakel a paraan et aromog kon tua itan. Ompatnag a say E.U. et makakaunay sanlasus taon nen say Abalaten ya Aprika. Kabekta et walay nalmoan kon nansengegay inkabiglak, say agtanton impanguman ed kapusoan na totoo.” Antoy angitonton ed sikato’d satan a makapakigtot a nalmoan?

“Sakey ed saray oras a mangibiig a tuloy ed Amerika et say 11 n.k. na Simba,” kuan nen Mathabane. Naimano ton anggan diad loob na simbaan et saray totoo so masuyat a mandayew a kaiba iray agda karasa. “Anto la kasi liknaan da ed arum ya agew na simba?” intepet to. Diad pangidanet a say edukasyon so managyat na pananguman, inkuan nen Mathabane: “Lapud edukasyon et naawat mo so panparpareho na totoo.”

Miabobon so Tastasi nen Jehova a say edukasyon so solusyon, balet nagkalalo lan irerekomenda ray edukasyon a nibase’d Salitay Dios. On, tutulongan ira na Biblia ta pian napaandi so panangidumaduma lapud rasa​—pati ed daldalin a kasmak so panbubusolan lapud etniko. Kada simba diad saray Kingdom Hall da, saray totoo ed nanduruman rasa tan nasyonalidad so mandaragup ta pian nibangat ed saray ganggan tan prinsipyo ed Salitay Dios, say Biblia. Anggapoy kokolektaen ed sarayan miting. Naabrasa kayon onatendi!