Bengatlan Magmaong Nen Saray Kosmetik

KAYARIN tinukoy so “palaway iran katulongan” ya inusar na bibiin panpaganggana, insimbawa nen apostol Pedro: “Imbes, kaukolan a say limgas mo et laktipen toy tuan inkatoom, say ag-onkupas a ganggana na matamoy tan mapalnan espiritu, a mabalobalor ed imaton na Dios.”​—1 Pedro 3:3, 4, Today’s English Version.

Makapainteres, sanen insulat na apostol so nipaakar ed ontan iran akinpaway a panagparakep, inusar toy porma na Griegon salitan koʹsmos, a lamut met na salitan Ingles a “cosmetic,” a say kabaliksan to et “panpaganggana nagkalalo la ed baog.” Kasin sinebelan nen Pedro iray Kristianon bibii a mangusar na makeup tan arum nin mipadparan panpaganggana? Anggapon balot so naromog ya ontan ed Salita na Dios. Imbes, aabuloyan to itayon mandesisyon ed sayan pamaakaran, kanian nailaloan a walay panduruma ed panlabayan.

Balet, no say impan-makeup et makapal, odino diad paraan ya agla marakep ed dakel, antoy nipapasabin impresyon? Agta personalidad a magasal, agmasimpit, maar-arte, mapasirayew, odino makasarili? On, pabandayen toy itsura na sakey a bii, anganko et mamawalay mauges ya impresyon nipaakar ed moralidad to.​—Ikompara so Ezequiel 23:36-42.

Bilang pamidbir ed saya, say biin ‘labay to so masimpit ed Dios’ et pambanikelan to, no desidien ton man-makeup, a nipabitar ed lupa to so inkalimpio ed nonot, inkamatamoy, kaabigan, tan kasimpitan. Saratan a kualidad so mamarakep ed limgas tan kaganggana to. Diad tua, balanglan desidien toy man-makeup odino andi, ipatnag to so dignidad tan akindalem a ganggana to. Saya so mangipatnag ed pikakabat to ed ipapabitar na saray salita nen Pedro ya inaon ed tagey, a walay bengatlan magmaong nen saray kosmetik.​—1 Timoteo 2:9, 10.