Report na Saray Manangiyabawag na Panarian
‘Diad Dios Amin a Bengatla et Nayari’
SARAY salita ed tagey, a naromog ed Mateo 19:26, so apaneknekan a tua parad sakey a marikit ed Venezuela. Kayari ton naaralan a kaukolan so nagnap a panmatalek ed si Jehova, atalonaan to so graben problema. Oniay salaysay to:
“Say baik so mapangpangasi tan maar-aro. Makapaermen ta sikatoy inatey sanen mantaon ak ni labat na 16. Ansakisakit ed siak so impatey to. Agurdo so nonot ko, ya agko anggan labay so ompaway ed abung diad sular mi. Say nansumpalan ko et nambukbukor ak ed amin lawarin panaon.
“Agko naneskuela, tan agko nantrabaho. Nansiansia ak labat ed kuartok. Lapud maer-ermen ak tan andiay kakaaro, sinagmak ko so pirmin depresyon. Aliknak ya anggapon balot so kakanaan ko tan labay ko lay ompatey tan panganggaen itan. Naynay kon itepet ed inkasiak, ‘Akin a niwala ak ni?’
“Say nanay ko so datin mangaawat na Panag-Bantayan tan Awake! iran magasin manlapud malangwer a Tasin manngaray Gisela. Sakey ya agew apasikmatan nen nanay ko si Gisela ya onlalabas ed abung mi tan intepet to’d sikato no natulongan toak. Inmabobon si Gisela a salien to, balet ta agko labay so miarapan ed sikato. Ag-iya anismaya ed si Gisela. Sinulat toak tan inkuanton labay toak a nakaaro tan walay sakey a mas importanti nen say sikato a malabay met a mikaaro ed siak. Inkuanton satan a persona et si Jehova a Dios.
“Atenyeg ak ed satan, kanian inebatan koy sulat to. Diad loob na taloy bulan et nansulatan kami. Kayari na pirmin impamaseseg nen Gisela, akapanpakpel ak a siansia pian mitongtong ed sikato. Diad pilimeron impantongtong mi, inyaral nen Gisela so Biblia ed siak, ya uusaren so libron Makapambilay Kayo na Ando lan Ando ed Paraiso diad Dalin. Kayari na impanaral mi, inimbitaan toak ya onatendi ed miting diad Kingdom Hall ed lugar mi. Abigla ak. Agak ni pinmawapaway ed abung diad loob na apat taon, tan say pakanonot a wadman ak la’d karsada et makapataktakot.
“Maan-anos ed siak si Gisela. Pinaseguroan toak ya anggapo so bengatlan takotan lapud ulopen toak a miaral. Inmabuloy ak a siansia. Sanen sinmabi kami ed Kingdom Hall, siak so manggiwgiw tan manlinget na ambetebetel. Agko nayarian ya ibano so siopaman. Anggaman kuan, inmabobon ak a mantultuloy ya onatendi ed saray miting, tan si Gisela so matoor a dinmalaw ed siak kada simba.
“Pian natulongan ak nen Gisela a makatalona ed inkanerbiyos ko, masaksakbay toak ya itagar a miaral. Onalagey kami ed puerta tan ibano mi so amin ya onsasabi. Diad ontan a paraan et makapiarap ak ed totoo a sansakey odino sanderwa, imbes ya intiron grupo a pinsanan. No naliknak ya agko la nayarian, iteksto nen Gisela ed siak so Mateo 19:26: ‘Diad totoo et agnayari iya, balet diad Dios amin a bengatla et nayari.’
“Anggaman mairap itan, ayarian ko ed saginonor so onatendi ed babaleg ni ingen a pandaragup na totoo diad sirkiton asamblea. Agaylan kabaleg itan a kundang parad siak! Nen Setyembre 1995, nampakpelan koy mitongtong ed mamatatken nipaakar ed pibibiang ed kada puertan panagpulong. Anem bulan ed saginonor, nen Abril 1996, insimbolok so dedikasyon ko ed si Jehova diad panamegley na bautismo ed danum.
“Sanen walay agano nin nantepet ed siak no panon ak ya akapanpakpel pian nagawaan ko iya, inyebat ko: ‘Dinaeg na pilalek kon mamaliket ed si Jehova so takot ko.’ Anggaman walaan ak nin siansia na sagpaminsan a pibarangkaan ed depresyon, napapabiskeg so gayagak diad panlilingkor ko bilang regular payunir. No nodnonoten koy apalabas, onabobon ak ed si Gisela. Walaan ak natan na sakey a Kaaro ya interesado ed siak tan ‘mamapabiskeg ed siak.’”—Filipos 4:13.
[Saray litrato ed pahina 8]
“Dinaeg na pilalek kon mamaliket ed si Jehova so takot ko”