Impanbiktorya Sumpad Mauges

“AKIN et saya so inatey ya aso ayewen to so katawan ko ya ari? Yabuloy mo komon ed siak ya onla ak, pikasik ed sika tan putolen ko so ulo to.” Kerew itan nen Abisai, sakey ya Israelitan hepe na sundalo. Satan so mapetang ya ebat to sanen nadngelan ton say katawan to, si Arin David, et gugulaen tan inayew na sakey a Benjamitan manngaran na Simei.​—2 Samuel 16:5-9.

Labay nen Abisai so onkiwas unong ed pilosopiyan kaslakan ya aawaten natan​—say ibabawi. On, labay nen Abisai a sagmaken nen Simei iray insulton imbunton to’d si David.

Balet, antoy reaksion nen David? Pinugeran toy Abisai, a kuanto: “Sikato so paulyan yo.” Anggaman inosenti ed saray akusasyon nen Simei, sipapaabeban pinugeran nen David so tukson ombawi. Imbes, impalima toy pamaakaran ed si Jehova.​—2 Samuel 16:10-13.

Sanen pinmawil si David ed trono kayari ton imbatikay agmatalonan impanrebeldi na anak to, sakey ed sankaunaan ya angibano ed sikato tan kinmerew na panamerdona et si Simei. Labay lamet nen Abisai a pateyen, balet pinugeran lamet nen David.​—2 Samuel 19:15-23.

Diad sayan inkagawa, pinaneknekan nen David so inkamatukoy to’d impangilitrato ed si Jesu-Kristo, a nipaakar ed sikato et onia so insulat nen apostol Pedro: “Sanen ayew-ayewen da agto binmales ya angayew . . . noag ingen inmatalek to so laman to ed manangiter na tunong.”​—1 Pedro 2:23.

Natan, nasisimbawa iray Kristiano a magmaliw a “mapaabeba ed kanonotan: Aleg ya ibales so mauges ed mauges.” (1 Pedro 3:8, 9) Diad panumbok ed kurson impanengneng nen David tan si Jesu-Kristo, ‘[makapantultuloy tayo met] a daegen so mauges na maong.’​—Roma 12:17-21.