Inrayew na Gobierno Iray Tasi

DIAD Cádiz, España, say daungan a syudad a nipasen ed manga 500 kilometron bandad abalaten-sagur na Madrid, say mayor a si Doña Teófila Martínez so angiter na plaka (nilitrato ed tagey) ed Tastasi nen Jehova. A nabasaan na: “Nanlapud munisipyo na Cádiz parad Tastasi nen Jehova bilang apresasyon ed pananulong tan saray pansasagpot da parad sayan syudad.” Anto ta so ginawa na Tastasi ya apagalangan ira na ontan?

Niiter itan bilang panamidbir ed impangapiger na Tastasi ed istadyum na syudad. Diad loob na pigaran sampot-simba, nilasus a Tastasi so nanboluntaryo a mangapiger ed saray kasilyas na football istadyum ed Carranza. Natan, amin na saramay mangusar ed istadyum so nagunggunaan ed saray nipeket a tubo, plumbing fixtures, tan datal.

Pigara lan taon a panggagayagaan na Tastasi nen Jehova so maabig a relasyon ed gobierno na Cádiz. Kada taon et mapangasi munisipyo a mangipapausar ed Tastasi nen Jehova ed Carranza Stadium parad tinaon a distrito kombension da. Kanian, panliketan na Tastasi a gawaen so antokaman pian napansiansian marakep so istadyum.

Anggaman ontan, nilikud ed panapanaon a pantrabaho ditan, maparanay a bibisitaen na Tastasi nen Jehova iray kaliberliber na syudad pian natulongay publiko ed sananey a dalan. Iproproklama ra so “ebanghelyo” na Panariay Dios. Siempre, say gagala ra’d pibibiang ed publikon ministeryo et aliwan pian pandinayewan ira na totoo. Susumpalen itan bilang katutulok ed ganggan nen Jesus ya ipulong so “ebanghelyo na panarian” tan pian “manggawa na babangatan ed amin a nasyones.” (Mateo 24:14; 28:19) Diad onian dalan et mailalo iray Tastasi nen Jehova a nalilingkoran day komunidad diad pangibabangat ed totoo diad “dalan na inkatunong.”​—Uliran 12:28.