Agew a Nodnonoten

Diad samay labin sakbay na impatey to, angipasa si Jesus na sankabukel ya andi-lebaduran tinapay tan sankopan ambalangan alak ed saray apostol to tan binilin toran mangan tan oninum. Inkuanto ed sikara: “Gawayo’ya a pakanodnonotan ed siak.”​—Lucas 22:19.

Diad sayan taon say anibersaryo na sayan ebento so ombana no Huebes, Abril 1, kaselek na agew. Saray Tastasi nen Jehova ed sankamundoan so mantitipon ed sayan espisyal a labi pian imatonan iyan Memoryal unong ed paraan ya ingganggan nen Jesus. Sikay maligsan tuloy ya iimbitaan a mibiang ed sikami. Ipangasin tepeten ed Tastasi nen Jehova ed lugar mo so eksakton oras tan pasen na sayan espisyal a miting.