Sakey ya Islan Niarawi tan Melag
SARAY adjective a mabetbet ya uusaren pian deskribien so isla na St. Helena et “niarawi” tan “melag.” Matukotukoy itan, ta sayan isla, a labinpiton kilometro so karukey tan samploran kilometro so kaawang to et 1,950 kilometro manlapud sankaasinggeran a bansa, say abalaten-sagur a gilig na dayat na Aprika. Dia adestiero si Napoléon Bonaparte nen 1815 ya anggad impatey to lapud inkatalo to.
No bantagen manlapud kadayatan, say isla et singa agnakubkob a salimbengan. Talagan sakey itan a bolkan ya agla aktibo a matuntundiris ed kadayatan ya Atlantiko a saray inkapareng na kelas to et sabien toy 500 anggad 700 a metro a katagey. Diad pegley to et wadtan so Mt. Actaeon, a sankaimano ed intiron isla lapud katagey ton 818 metro. Lapud ambetel a siplog na dagem tan daluyon na Abalaten Atlantiko, inkalapagan a kabkaabigan tan marakep so klima na isla. Balet manlapud abebeban gilig na dayat ya anggad sulinek na kapalandeyan, walay baleg a panduruma na kipapasey panaon tan tantanaman.
Teritorya na Britanya so St. Helena nanlapulad saginonor na koma-17 siglo. Say melag a populasyon na manga 5,000 et laok na totoon tuboy Europa, Asia, tan Aprika. Ingles so uusaren a salita ed intiron isla, balet ta dumay panangibekas. Anggapoy airport dia; say mogmon pikoneksion ed arum a bansa et diad panamegley na barko, a regular ya ondadalan ed Abalaten ya Aprika tan Inglatera. Diad tua et ginmapo labat nen kapegleyay dekada na 1990 so panagbrodkas ed telebisyon, diad tulong na satellite hookup.
Diad asasakbay na dekaday 1930, akasabi so maong a balita na Panarian na Dios ed sarayan lugar ed unonan pankanawnawa. (Mateo 24:14) Diad inlabas na saray taon, dakel a taga-isla so angayarian ed sayan kayamanan a papagmaliwen ton agmakabaliksan iray materyal a kayamanan. (Mateo 6:19, 20) Natan, kabkabat so St. Helena nisesengeg ed resyo na Tasi ed populasyon a 1 kada 31, sankaabigan a resyo ed mundo!
[Saray Mapa ed pahina 24]
(Parad aktual a format, nengnengen so publikasyon)
St. Helena
JAMESTOWN
Levelwood
APRIKA
ATLANTIC OCEAN
St. Helena