Manalwar ed Simonya!
SI Simon a taga-Samaria so nirespeton maong diad lugar da. Sikatoy nambilay nen inmunan siglo K.P., tan asagyat a tuloy iray totoo ed panagmahiko to a kuan da nipaakar ed sikato: “Sayan too sikato so Pakayari Dios, a manngaran na Baleg.”—Gawa 8:9-11.
Balet, kayarin nagmaliw a bautismadon Kristiano si Simon, binidbir toy pakapanyarin mas abalbaleg nen say datin impanengneng to. Satan imay pakapanyarin impagamor ed saray apostol nen Jesus, a mamasarag ed sikaran ipanabang ed arum iray mamilagron langkap na masanton espiritu. Asagyat a tuloy si Simon ya inopresian toray apostol na kuarta tan inkerew to: “Iter yo met ed siak so saya a pakapanyari, pian siopaman a pangitapewan ko na limak, awaten to so espiritu santo.”—Gawa 8:13-19.
Binaat nen apostol Pedro si Simon, a kuanto: “Nabalang so pilak mo, pati sika komon, ta inisip mo a say palangkap na Dios nagamoran ed pilak. Andi biang mo ono kapalaran mo ed saya ya inkabtang, ta aliwan maptek so pusom ed arap na Dios.”—Gawa 8:20, 21.
Nanlapud sayan salaysay na Biblia so salitan “simonya,” a naukeran bilang “say kasalanan nipaakar ed panagsaliw tan panaglako na saray posisyon odino promosyon ed relihyon.” Bibidbiren na say New Catholic Encyclopedia a nagkalalo la manlapud koma-9 ya anggad koma-11 a siglo “say simonya so kinmayat ed saray monasteryo, ed abebbeba iran klero, ed saray obispo, tan ed saray papa ni ingen.” Ipapaimano na say komasiam ya edisyon na The Encyclopædia Britannica (1878): “Say impanaral ed awaran na saray sekreton miting ed panagpili na Papa so angombinse ed saray estudyante ya anggapo nin balot so eleksion ya ag-amatikan na simonya, bangta diad baleg a bilang na saray inkagawa say simonya ya inagamil ed sekreton miting so sankaugsan, sankabandayan, tan sankaimanon klase.”
Nepeg a manalwar iray tuan Kristiano natan ed simonya. Alimbawa, arum so nayarin mangiter na alablabas a dayew odino dakel a regalo ed saramay makapangiter ed sikara na kaaruman iran pribilihyo. Misunian, saramay makapangiter na ontan iran pribilihyo so nayarin mangipanengneng na paboritismo ed saramay makayari—tan mabetbet a magunaet—a mangiter ed sikara na saray regalo. Nalalanor so simonya ed saratan situasyon, tan malinlinew a kokondenaen na Kasulatan so ontan a kurso. “Manpataoli ka sirin ed sayan karelmengan mo,” so insimbawa nen Pedro ed si Simon, “et mikasi ka ed Katawan, pian napaandi, no nayari, so sayan isip na pusom [“sayan getmam,” New Jerusalem Bible]. Ta nanengneng ko a wala ka ed apgo na kapaitan tan inkabalor ed golonggolong na kaugsan.”—Gawa 8:22, 23.
Mapatnag, atalosan nen Simon so inkaseryoso na mauges a pilalek to. Akikasi’d saray apostol: “Pikasi yo ak pa sirin ed Katawan, pian anggapo komon ed saray bengatlan sinalita yo so napasabik.” (Gawa 8:24) Diad panumbok ed importantin leksion a lugan na sayan salaysay, panggunaetan na saray tuan Kristiano so ompaliis ed dinanman a matik na simonya.