“Siopa So Angyan na Kakabatan ed Saray Bandad Dalem a Kabiangan na Lurem”?
“SANO nanengneng yo so lurem ya onalagey ed sagur, kuan yo a tampol, ‘Mayamaya so onsabi,’ et ontan so nagawa. Et no sakey a dagem ya abagat so onsibok, kuan yo, ‘Makaatong a petang so wala naani,’ et sikato so nagawa.” Sarayan salita nen Jesus, ya insulat na managsulat na Ebanghelyon si Lucas, so alimbawa na saray panangipasakbay na kipapasey panaon a singa ginagawa ed karaanan a Palestina. (Lucas 12:54, 55) Walaray sirkumstansian saray totoo nensaman so makatalos na sinyales tan makapanggawa na suston agmanbayag iran prediksion.
Natan, saray meteorologist so manguusar na komplikadon tuloy iran instrumento, a singa saray ontetelek ed dalin a satellite, Doppler radar, tan saray mabiskeg a computer, pian nakalkula so panguman-uman na kipapasey panaon ed mas andukey iran peryodo. Balet saray prediksion da so mabetbet a pabes. Akin?
Dakel a sengegan so mamapairap ed suston panangipasakbay na kipapasey panaon. Alimbawa, say ag-iilaloan a panguman-uman na temperatura, say inkamalinaew, say puersa na dagem, tan say kapeles tan direksion na dagem et mamasuliwet ed saray pamaakaran. Niarum ni’d saya et wadtan iray komplikadon pankokoneksionan na agew, lure-lurem, tan kadayatan, ya agni sigpot a natatalosan na saray sientista. Lapud satan, say panangipasakbay na panaon so mansiasiansian aliwan suston siensia.
Say limitadon pikakabat na too ed panaon so mangipapanonot ed sikatayo ed saray nitepet ed si Job: “Siopa so angilalak ed saray terter na linaew? Siopa so akan-eges na pinawayan na yelo? . . . Nitagey mo ta so bosis mo ed saray lurem, pian say inkadaakan na saray danum nasakbongan da ka? . . . Siopa so angyan na kakabatan ed saray bandad dalem a kabiangan [“na lurem,” NW], odino siopa so angiter na pakatalos ed kanonotan [“diad say pakatandaan ed tawen,” NW]? Siopa so makabilang na saray lurem ed panamegley na kakabatan, odino siopa so makapangibung na saray poronggo na tawen?”—Job 38:28-37.
Say ebat ed sarayan amin a tepet et, Aliwan too noagta si Jehova a Dios. On, anggan panon lay inkakabat na too, say kakabatan na Manamalsa tayo so sankasuperyoran a tuloy. Talagan panangaro ed biang to a ginawa ton niwala ed sikatayo so kakabatan to diad saray pahina na Biblia, ta pian napagmaliw tayon matalona so dalan tayo.—Uliran 5:1, 2.