“Sikatayoran Katoliko so Walaan na Dakel ya Aralen Manlapud Sikara”

SAYAN komento nipaakar ed Tastasi nen Jehova so imbaga na sakey a maestra ed Bari, Italya, leleg na klase to ed high-school nipaakar ed awaran na relihyon. Imbaga na maestra ed klase ya usaren toray videocassette bilang katulongan ed pambangat. Diad impakadngel ed saya, sakey ed saray estudyante, 18 años a si Roberto, so angisuherin ipibali so relihyon to ed diskusyon. Inyopresi nen Roberto ed maestra so video a Jehovah’s Witnesses​—The Organization Behind the Name. Inawat toy opresi nen Roberto, tan say intiron klase na ngalngalin 30 estudyante so akabantay ed video. “Amin so nandinayew ed pankakasakey, say organisasyon, tan say aralem a panangaro ya ontatalona ed limog na Tastasi nen Jehova,” so kuan nen Roberto. “Sikara ni ingen so nikelawan ed pakaamta’d 40 milyon a kopya na Say Panag-Bantayan tan 36 milyon a kopya na Awake! so niyiimprinta kada bulan.”

“Agko inisip ya ontan kayo kaorganisado,” so inkomento na pigaran kaklase nen Roberto kayari impakapanbantay ed video. Nipaakar ed Tastasi nen Jehova, onia so inkuan na maestra ed klase: “Imanoen no panon a say pananisia ra so mamapakiwas ed sikaran magmaliw ya ontanlan nankakasakey tan organisado. Sikatayoran Katoliko so walaan na dakel ya aralen manlapud sikara.” Say video tan say tinmumbok a diskusyon na klase so pirmin angitandoro ed magmaong a pakatalos nipaakar ed Tastasi nen Jehova.