Report na Saray Manangiyabawag na Panarian
Anamoten so Pankanawnawa ed Panangiyabawag ed Maong a Balita
SANEN inmunan binmisita iray managdiskobren taga-Europa ed Gulpo na Venezuela tan Lake Maracaibo, say gilig na baybay so aseksek na angkekelag ya alolong ya impapaalagey ed saray lusek ed atapew a kadanuman. Say nenengnengen so mangipanonot ed Venice, Italya, a no iner et ipapaalagey na totoo so ayaman da ed gilig na danum. Say mansasalitay Español iran managdiskobre so angingaran ed lugar a Venezuela, a kabaliksan toy “Little Venice.”
Natan, diad sayan marakdakep a bansa et nagagawa so sananey a klase na panagpaalagey a programa, a satan et espiritual. Okupado iray Tastasi nen Jehova ditan ed panagtanem na bukel na Panarian ed kada matukoy a pankanawnawa. Say resultan espiritual a panagani so mangitatarok na nagkalalon panangigalang “ed Katawan na aaniyen,” si Jehova a Dios.—Mateo 9:37, 38.
Sanen binmisita so sakey a managbiahen manangasikaso ed sakey a kongregasyon ed estadoy Zulia ed mamaamianen-sagur a Venezuela, inyuksoy na Tastasi diman ed sikato tan ed akulaw to a bisitaen so melag ya isla ya asingger ed tatawagey Toas. Legan ya akalinyan manaalagar pian naabot so kabkabuasan a biahe na lantsa a mamaarap ed isla, say akulaw na managbiahen manangasikaso, si Mery, so angisuheri ed kaiba to, sakey a sister a sigpot-panaon a payunir, a pulongan day pigaran trabahador na lantsa. Inmabobon so agin payunir.
Diad inyasingger ed sakey a mekaniko, imparungtal nen Mery so libron Pikakabat a Mangitonton ed Andi-Anggaan a Bilay. Impanengneng to’d mekaniko so kapitulon “Panangipaalagey na Sakey a Pamilya a Mangigagalang ed Dios,” ya ompatnag a natalosan to. Insan insalaysay nen Mery a diad panamegley na sayan publikasyon, nayarin sikatoy nawalaan na panagaral na Biblia diad mismon abung to. Inawat toy libro, tan niyareglo so sakey ya ondalaw ed sikato diad abung to.
Ag-abayag ed saginonor, agaway espisyal a sakey-agew ya asamblea ed saman a lugar. Agaylay impakasurprisa nen Mery ed impakanengneng ed mekaniko, si Senor Nava, a wadman a kaibay akulaw to tan say duaran kalangweran ya ilalak ton bibii! Tinepetan nen Mery so asawan bii no antoy nibaga to nipaakar ed panagaral day Biblia bilang pamilya. Makapasurprisan tuloy so ebat to.
“Pisalsalamatan koy Jehova lapud impakaamta mi ed katuaan,” so inkuanto. Insan insalaysay to. “Sanen apitongtongan yoy masiken ko, kapkapantaynan to’d siak lapud walay bii to. Sikato met so mainum. No maminsan sano abuek la, sikatoy abusado, a kainglit na melag a komunidad ed isla. Sikatoy mangaagamil met na espiritismo. Balet, say pikakabat ed Biblia ya agamoran to ed panaaral to so tinmulong ed sikaton manggaway baleg a pananguman ed bilay to. Intunda ton amin so agmalinis iran agagamil to. Nandinayew a tuloy iray atateng ton Katoliko ed sarayan pananguman. Malikeliket ira a sikato la natan so responsablin asawan laki tan ama.”
Abautismoan si Senor Nava nen 1996 tan peles a manlilingkor bilang sigpot-panaon a ministro. Say akulaw to, si Jenny, so abautismoan nen 1997. Nandinayew a tuloy so meyor na baley ed impanguman na sayan mekanikoy lantsa a sikato met so papaiyaralan na Biblia. Alay liket na agagin bibii ya inanamot day pankanawnawa ed panangiyabawag ed maong a balita legan ya akalinyan manaalagar ed lantsa ed saman a kabuasan!
[Saray litrato ed pahina 7]
Say impanginabang ed maong a balita ed mekanikoy lantsa so angitarok na maliket iran resulta