“Mansiansia Kayo Ditan”

Sakey a grupo na Tastasi so manpupulong ed sakey ed ngalngalin 30 ya isla a tugyopen na saray Isla na Cyclades na Gresya. Leleg na pankakabkaabungan na duara ed sikara, akaabet ira na sakey a polis ya inkuan to’d sikaran ontumbok ira ed sikato ed istasyon na polisya. Ag-abayag kasabi ra ed istasyon na polisya, nan-ring so telepono. Saman et say pari ed baryo. “Abalitaan kon walaray Tastasi nen Jehova ed baryo,” inkuanto. “On, walay duara’d dia,” so inyebat na polis. “Onlaak ditan a tampol.” Diad modoy tongtongan, medyo tinmakot iray agagi.

Balet, diad insabi to, makakaimis so pari, pinasamanoan tora, tan yinmurong ed abay na polis. Leleg na singbatan, inmalinsuag so polis bangta say pari so nansiansian kalmado tan makortesiya. Inkuanto’d samay polis ya agto memelagen iray Tastasi, tan inyarum to: “Naebatan da so antokaman a tepet lapud nipapasal ira ed Teokratikon Eskuelaan Parad Panagministro. Mas mainomay a kusboen so mundo nen say salatan so pananisia na sakey ed Tastasi nen Jehova.”

Legan a manpupulong ed kaimbuasan, nabet lamet na agagi imay pari tan intepet da: “Akin a makaaro kayon tuloy ed sikami legan na singbatan diad istasyon na polisya?” Inkuan na pari ed sikara a dakel iray kabat ton Tastasi diad Syros tan sikatoy pigapigay taon lan manbabasa na saray Panag-Bantayan tan Awake! a magasin. Diad tua, aminpiga-piga lan angawit na magasin a Panag-Bantayan, ya akasigpit itan ed sakey a folder, tan uusaren to’d sermon ed simbaan. Inkuanto: “Agko amta no makabaliksan ni manbilay no andian ak na literatura yo. Mangiiter itan ed siak na ilalo.”

Saginonor, inkuan na pari ed Tastasi: “Walay nepeg kon ibaga ed sikayo. Mansiansia kayo ditan. Agkayo nalilingon taynan itan. Sayay ibabagak ed sikayo natan so sankaabigan a sermon a niiter ko ed kapiganman, tan agko labat ibabaga itan; talagan manlalapud pusok itan.”