Sakey ya “Alimbawa ed Pankakasakey tan Impanaagi”

Ontan so impaneskribe na sakey a bii ed saray kiwas na Tastasi nen Jehova kayari impakasagmak toy makapaot-ot ya impakaandi na sakey a membroy pamilya. Insalaysay to:

“Diad biang ko tan say pamilyak, labay kon pisalamatay Tastasi ed Italyanon kongregasyon diad Freiburg, Alemanya. Likud ed si kuyak ya Antonio tan say asawa to, si Anna, aliwan Tastasi nen Jehova so pamilyak. Abayag mi lan babalawey pinili ran relihyon, balet ta lawas min rerespetoen itan.

“Balet, natan, kaukolan min umaney panag-isip mi. Diad tua, naeksperiensia mi sakey ya alimbawan impanaagi tan aron agmi inilaloan a balot.

“Makapaermen, asakbay ya inatey si Anna lapud aksidenti’d dalan. Lapud manaayam kami ed Italya, aligliwa mi daiset si kuyak ya Antonio tan saray anak to. Sikatoy tinulongan met na Tasin agagi to. Sikatoy atulongan da diad indalaw da, ed saray balikas da, ed pananisia ra, ed suporta ra ed pisikal, moral, tan ekonomiya. Lapud agko personal a napisalamatay kongregasyon, labay koran pisalamatan panamegley na magasin yo lapud alimbawa ed pankakasakey tan impanaagi ya agmi nalinglingwanan.”

Sayan maabig a komento na bii so aapresiaen. Unong a naobserbaan to, saray Tastasi nen Jehova so walaay internasyonal ya impanaagi. (1 Pedro 2:17) Babayuboan day mabiskeg a siglaotan na aroan ed limog da, lapud kabat dan say aro ‘so singer ed inkayadyari.’ (Colosas 3:14) Anggan diad sankairapan iran kipapasen, a nayarin nagawa ed sikatayon amin, mansiasiansian maapit iray Tastasi nen Jehova ed Dios tan ed totoo to.​—Uliran 18:24; Eclesiastes 9:11; Juan 13:34, 35.