“Nanlapu ed Inkaugaw Mo Akabatan Mo”

UNONG ed agano niran sientipikon impanaral, say pitongtong ed kapanyanak so makaimpluensian maong ed kabayuboay utek da, ya ileletneg toy abilidad dan manisip, mankatunongan, tan manresolbi na saray problema. Onia so nagkalautlan kaso leleg na unonan taon na bilay na ugaw. Irereport na International Herald Tribune a panisiaan la natan na pigaran managsukimat a “say bilang na salita a narerengel na kapanyanak ed kada agew so sakey a sankaimportantian a manamasakbay ed arapen ya intelehensia, aligwas ed eskuelaan tan inkamausar ed sosyedad.”

Balet, nepeg a manlapud too iray insangin salita. Satan so mangipatnag ya aliwan kasandi so telebisyon odino sakey a radyo.

Inkuan na neuroscientist ed University of Washington diad Seattle, E.U.A.: “Naamtaan mi natan a say pankokonektaan na saray nerve so napoporma ed sankasakbayan a parti na bilay tan say utek na kapanyanak et literal a manaalagar na saray eksperiensia a manetermina no panoy kagagaway pankokonektaan na saray nerve. Aganggano mi ni labat ya amoria no panon kasakbay so igagapo na sayan proseso. Alimbawa, naaralan na saray kapanyanak so tanol na dilin salita ra kasabi anem bulan.”

Susuppiaten na agano nin panagsukimat so kaslakan ya opinyon a saray ugugaw kuno et ombulaslas ed intelehensia no naikdan iray daakan a panangaro. Ipapabitar met na satan so betang na atateng ed iyaaligwas na ugaw.

Mangipapanonot iya ed sikatayo ed saray salita na apuyanan a sulat nen apostol Pablo ed si Timoteo: “Nanlapu ed inkaugaw mo akabatan mo so saray masanto a sulsulat, a makayari a manggawa ed sika a makabat ed kilalaban.” Maseguron say masanto a sulsulat, ya imbalikas ed kapanyanak a Timoteo na mananisian ina tan bai to, so walaay importantin betang ed inyaligwas to bilang matalonggaring ya aripen na Dios.​—2 Timoteo 1:5; 3:15.