“Mapuersa tan Makakombinse”

“MANLAPULAD nabuas et usaren ko iya’d panagpulong, lapud saray argumenton lugan to et talagan mapuersa tan makakombinse,” so insulat na sakey ed Tastasi nen Jehova ed Pransya. Insulat met na sakey a Tasi ed Estados Unidos: “Binasak itan a tampol tan maganat ak lan mangusar ed satan diad lawak a ministeryo, lapud dakel so nanaabet mi a totoo ya agmananginenen tan agmanmamatalek ed Biblia.” Anto so dedeskribien da? Say 32-pahinan brosyur ya apauloay Libron Parad Amin a Totoo, ya impaway na Watch Tower Society diad “Pananisia ed Salita na Dios” iran Distriton Kombension ya agawa legan na 1997/98.

Intadia iyan publikasyon a sinononot ed partikular a dumerengel​—saramay nayarin di-aral balet ta dagdaiset so pakaamta ra’d Biblia. Dakel ed saratan ya indibidual so walaay mapeget iran opinyon nipaakar ed Biblia, anggaman agda nin balot abasa itan. Say gagala na brosyur et say pangombinse’d managbasa ya, anggan panon et say Biblia so makanakanan usisaen. Agpapaskaren na brosyur so managbasa a mangawat ed panmorian say Biblia et impuyan na Dios. Imbes, aabuloyan na satan iray katuaan a mismon mangipaliwawa. Agmairap a talosan so inkisalita to noagta satan et malinew tan diretsaan.

Singa ipapanengneng na inaon ed tagey iran komento, magunaet iramay presenti ed saray kombension a mangusar ed sayan brosyur diad lawak a ministeryo ra. Alimbawa, diad Pransya et inorganisa so espisyal a kampanyay panagpulong parad Agosto 23 tan 24 sanen nandaragup ed Paris iray nilasus nilibon mamalangwer iran bisita a nanlapud intiron mundo parad World Youth Day. Onliligada’d 2,500 a Tastasi (a maslak et manedad na 16 anggad 30) so akapangipalimay 18,000 a kopya na brosyur ed Aleman, Español, Ingles, Italiano, Polako, tan Pranses.

Diad amin a paraan, usaren tayo iyan brosyur a, Libron Parad Amin a Totoo, ed ministeryo tayo. Napaneknekan komon a makana iyan publikasyon ed panangombinse’d rasonablin totoo a kaukolan dan usisaen a mismo so Biblia.