Kinomendaan so Sakey a “Nikadkaduman” Kombension

SAKEY ya anawnser ed radyo diad Lima, Peru, so manduaruwan tuloy nipaakar ed Tastasi nen Jehova. Balet, kayari impakaatendi to’d sakey ed saray distriton kombension da, biglan anguman so awawey to. Diad tua, sikatoy pirmin nandinayew a nankomenton paborabli ed saray dumerengel to ed radyo. Say onggendan so inaon manlapud imbaga to:

“Say kombension so talagan nikadkaduma. Anggapon balot so piraso na papel ed semento nisay walay managlako. Anggapoy panseseksekay luluganan. Liman libo duan lasus a totoo so linma ed istadyum ed dili ran gastos, balang sakey so akaegna na timba, lupot, panagpokpok, dustpan, panis, hand brush, guwantis, tan sabon a panuras tan panggasagas ed lugar. No walay pipintaan, onla ra pian pintaan. Tan iner so nanlapuan na kuarta? Diad sikaran mismo! Sanen pinakabatan ira ed bengatlan kaukolan a gawaen, amin da so tamtampol a mangiter na kuarta ra. Petepeteg, anggapoy pibabali na Iglesia Katolika ed ontan iran pamaakaran. Labay kon pasamanoen so Tastasi nen Jehova tan saray angidaulo ed sayan ebento. Tan kaliktan kon ibaga ed sikaran masimsimoon, Tulongan tan bendisionan kayo komon na Dios.”

Diad saray syudad ed intiron mundo ed sayan taon, panggayagaan na Tastasi nen Jehova so “Maridios a Paraan na Panagbilay” a Distriton Kombension. Kasin presenti ka?

[Blurb ed pahina 32]

“Anggapon balot so piraso na papel ed semento”