Sakey a Makapaangat ya Ebat

SAY Catholic Herald, sakey a peryodiko na Romano Katoliko diad Britanya, so agano nin angipalapag ed onggendan a sulat na sakey a managbasa diad Wales: “Sakey a labi et tinmoktok so duaran Tastasi nen Jehova. Nikuanko a say Iglesia Katolika so mangarantiya’d autentisidad na Balon Sipan ya angaonan da. Diad impakasurprisak et inmabobon so sakey ed sikara. ‘On,’ kuanto, ‘gagarantiyaan yo itan balet agyo itan tutumboken. Inkuan nen Jesus a, “manaaroan so sakey tan sakey ed sikayo, salanti, singa impangarok ed sikayo,” balet ta manpapateyan kayo. Diad say kaunoran a guerra, saray Katoliko so amatey ed saray Katoliko, balet anggapoy Tasi nen Jehova ya amatey na [kapara ton] Tasi.’ Antoy nagawaan ko noag say onabobon? Panon tayon naipikasi so pakapikasakey ed ‘saramay aliwan Katolikon agagi tayo’ no anggapo labat so peteg a pankakasakey ed limog tayo? Agta kaukolan tayo nin ipetek ya unona iyan kabandayan?”​—Juan 15:12.

Say duaran guerra mundial ed sayan koma-20 siglo so parehon ginmapo ed Kakristianoan tan anigway na ngalngali 50 milyon anggad 60 milyon a bilay. Balet, petepeteg a nibagan, say Tastasi nen Jehova so ag-akibiang ed saratan a bakal, nisay nalalanor ira’d antokaman a gutgutan ed kaplesan a nagagawa. Panon iyan posibli? Pakagunggunaan mo so pakaaral ni nipaakar ed malet iran bedber na Kristianon aro tan pankakasakey a wala ed masulok a limaran milyon a Tastasi nen Jehova ed sankamundoan.​—Ikompara so Isaias 2:4.

[Picture Credit Line ed pahina 32]

Litrato na U.S. National Archives