Report na Saray Manangiyabawag na Panarian

Saray Tobonbalon Mangidadayew ed Dios Diad Demokratikon Republika na Congo

PIGARAN siglo lay apalabas, sililigsan inimbitaan na salmista iray kalangweran a mibiang ed panangidayew ed Ari na inkamagnayon: “Balangla so tobonbalo a lalaki, tan birhenes; mamasiken, tan saray ugugaw. Idayew da so ngaran nen Jehova, ta say ngaran to labat so masuri.” (Salmo 148:12, 13) Say onggendan iran eksperiensian manlalapud Demokratikon Republika na Congo so mangipapabitar ed sayan agnaparaan a pribilihyo.

• Pandinayewan na landlord na sakey ya espisyal payunir so kondukta na Tastasi nen Jehova. Inabuloyan to sirin so Tastasi a mangiyaral na Biblia ed anak ton bii a mantaon na limara, si Fifi. Kayari impakaimano ed iyaaligwas nen Fifi ed panaaral to’d My Book of Bible Stories,a inabuloyan na ama ton onatendi ed saray miting diad Kingdom Hall. Diman et naaralan nen ugaw a Fifi iray kanta na Panarian diad panagkantaan na Tastasi. Nagkalalo lan agustoan to so numero 4, ya apauloan na “God’s Promise of Paradise.”

Sakey ya agew et deniside na ama nen Fifi ya itagar ed simbaan. Diad inkabigla na amin, aglabay nen Fifi a kantaen iray kanta na relihyon. Akin? Lapud liknaen ton saray kanta a kakansionen ed relihyon nen ama to so agmitunosan ed nanaaralan to diad panaaral toy Biblia. Imbes, sipapakpel ton kinantay paborito ton kanta nipaakar ed Panarian.

Kayari na aminpigan insaew ed panasalin umanen so kanonotan to, deniside na papangulo na relihyon ya ekalen so mantaon na limara a si Fifi manlapud relihyon da! Anggaman ed onian makapuy ya impantrato, nansiansian kalmado so ama to. Inkinon to a si Fifi so angala na malet a talindeg ed sisiaen to. Labay na atateng nen Fifi ya itultuloy toy pilimog ed Tastasi nen Jehova.

• Sanen deniside na tin-edyer a lakin manngaran na Lukodi so paiyaralan na Biblia ed Tastasi nen Jehova, sumpan maong so ama to. Diad sakey ya inkagawa sanen ompipikal si Lukodi pian miaral diad Kingdom Hall, sikatoy pinagyaw na ama to na palang. Diad sananey ya inkagawa si Lukodi so binasigan nen ama to, a binmiret a maong ed beneg to. Anggaman ed pirmin isusumpa, nansiansian mapekder si Lukodi ed determinasyon ton magmaliw a sakey ed Tastasi nen Jehova. Intultuloy toy inmaligwas tan abautismoan. Natan et sikatoy manlilingkor bilang regular payunir.

Si Sona, yugtan a bii nen Lukodi, so asagyat a tuloy diad talindeg na kuya to tan impaiyaralan met na Biblia ed Tastasi nen Jehova. Balet, pian amperen ed panaaral to, impaneskuela na ama ra ed sananey a purok, ya anggapoy Tastasi. Anggaman kuan, niyugali la nen Sona ya itongtong ed arum so nipaakar ed bengabengatlan naaralan to. Bilang resulta, say kapinsan to so nagmaliw met ya interesado.

Sanen abalitaan na Tastasi ed kabangibang a purok so panpupulong nen Sona, sikatoy binisita ra tan inyareglo ray regular a panangiyaral na Biblia ed sikato. Intultuloy toy inmaligwas tan ag-abayag et akiulop ed si kuya to bilang dedikado, bautismadon Tasi nen Jehova. Niarum ni, say kapinsan to natan so agbautismadon manangipalapag, tan sakey a panagaral na libro so nikokondukta ed sayan purok.

Agaylan makapakelkelaw tan makaligliwa sano mibiang iray kalangweran diad pangigalang ed ngaran nen Jehova!

[Paimano ed leksab]