Makagungguna Iran Labin Agpakaugip

ANGGAN saray ari so walaan na saray labin agpakaugip. Akaeksperiensia na ontan so makapanyarin manuley na Persia nen komaliman siglo K.K.P., si Asuero. Anganko liknaen ton apaulyan toy sakey a susungpalen, kanian impaibasa to iray maarin rekord. Naamtaan to a say matoor ya aripen, a Mardokeo, so amaer na pangigagaem a pamatey balet ta agni atumangan. Determinadon ipetek a tampol nen Asuero iyan impakaliwat. Ipapanengneng na saray makagunggunan epekto na saray kiwas to ed totoo na Dios a say insomnia na ari et nanlapud Dios.​—Ester 6:1-10.

Say kongregasyon na Tastasi nen Jehova diad nibaybay a baley a Hermanus ed Abalaten ya Aprika so walaay rason pian nonoten iyan seksion ed Biblia. Dati iran mantitipon ed inabangan a hall. Diad loob na dakel lan taon et nanggunaetan day pakasaliw na lote a pangipaalageyay dilin Kingdom Hall da. Kabekta, nen 1991, sakey a mabmablin lugar so inyopresi na Konsilyoy Baley.

Balet, aglabay na arum a nilako so lugar ed saray Tastasi nen Jehova. Kayari impakabaya ed loob na pigaran bulan, pinakabatan so kongregasyon a walay taloy-taon a panangipaleen (moratorium) ed pangilako na lote ed saray relihyon, tan insener so pangiyopresi ed dalin. Nen Mayo 1993 nansulat lamet so kongregasyon, a kekerewen ed konsilyo a konsideraen da lamet so desisyon da. Naawat day ebat ed sakey-estansan sulat, a kuanton oneepekto ni so panangipaleen.

Sakey a labi ed Oktubre na satan a taon, sakey ed saray konsihal na baley so ag-akaugip. Nampalabas na oras ed impanbubukay ed saray abayag lan rekord a nanmitingan na konsilyo pian amtaen no walaray bengatlan kaukolan ya imanoen. Say sulat na Tastasi ya onkekerew ed konsilyo pian konsideraen lamet so desisyon da so naimanoy konsihal. Kanian deniside ton ipilaktip itan ed agenda parad ontumbok a miting da. Labay ton ipaimano ya inaplayan la na Tastasi nen Jehova so dalin sakbay a nipaakseb so panangipaleen na lote ed saray relihyon.

Diad inlabas na panaon inter ed kongregasyon so parehon lote a niyopresi la ed sikara nen 1991! Wala itan ed manunaan a kalsada, a mainomay a laen na saray membroy kongregasyon tan saray interesado. Angipaalagey iray marakep a Kingdom Hall, a satan so nidedika ed si Jehova nen Oktubre 5, 1996.

Anggaman kaermenan na kongregasyon so impakaalipanesan na konsihal lapud ag-impakaugip, nayarin sikatoy atambayo ed bengatlan anggan si Arin Asuero et akasagmak met na ontan. Tan say nansumpalan ed namparan kipapasen so makagungguna. Say kongregasyon ed Hermanus so maseguron misalsalamat a maong ed impakawalaay dili ran Kingdom Hall, sakey a sentro parad puron panagdayew tan teokratikon panangibangat ed sayan bantog a nibaybay a baley.​—Hebreos 10:24, 25.