Pangagwat na ‘Aralem a Danudanum’

ONIA so inkuan na proverbioy Biblia: “Say simbawa ed puso na too sikato so singa aralem a danum; balet say too a makatalos sikato so naagwat to.” (Uliran 20:5) Diad panaon na Biblia mas mairap so panasol na danum nen say ed dakel a daldalin natan. Sanen akitongtong si Jesus ed Samaritana, sikatoy manaasol na danum manlapud subol nen Jacob, sakey a bobon a ngalngalin 23 metroy kaaralem to!​—Juan 4:5-15.

A singa ibabaga na Uliran 20:5, kaukolan so pakatebek pian naagwat so aralem a kanonotan tan liknaan a walad puso na too unong a nakakaukolan so sagpot ed pangagwat na danum manlapud bobon. Tua iya ed maslak a kipapasen na bilay. Alimbawa, nayarin kabat moray indibidual a diad dakel lan taon et akatipon la na dakel a kakabatan tan eksperiensia. No andian iraya na inklinasyon a mangiboluntaryo ed agkinerew a simbawa, nakaukolan yon agwaten ed sikara. Diad pangipanengneng na interes, pantepet, tan mataktikan pangusisa, niyasol moy, singa panangibaga, timbam ed aralem a bobon na kakabatan.

Matukoy met so simbawa na Uliran 20:5 ed pamilya. Mabetbet narerengelan ed kaasawaan a bibii: “Ag-ipapaamta na masiken ko ed siak no antoy nalilikna to!” Nayarin ikuan na asawan laki: “Basta labat agak eselan na asawak!” Diad ontan iran situasyon, nakaukolan so pakatebek pian naagwat so kanonotan a niyaralem ed puso na kapareha. Saray mataktikan tepet ya (Abanalan ka ta? Antoy agawa? Antoy nitulong ko?) so mabetbet a mangigapoy masimoon a tongtongan. Say pangipanengneng na ontan a pakatebek et pabiskegen toy bedber na panamaley, diad kagunggunaan na sanasawa.