Siopan Sipan so Napanmatalkan Mo?
NEN 1893 et nantitipon so sakey a grupo na 74 a komentarista ed sosyedad diad Chicago World’s Fair pian pantongtongan so nipaakar ed arapen. (Satan a lugar so nipanengneng ed tagey.) Diad inenengneng ed arapen a 100 a taon nanlapulad saman ya anggad 1993, impasakbay daray onggendan nilikud ni ed arum: “Dakel a totoo so makapambilay na 150 a taon.” “Ondaiset iray prisoan tan say diborsio so ipasen lan agnakaukolan.” “Magmaliw a mas simpli iray gobierno, lapud say tuan kinabalgan et lawas ya ontundas ed pagmaliw a simpli.”
Mipadpara, nen 1967 impasakbay na libron atituloay The Year 2000: “Diad isabi taon a 2000, maseguron naparaan, naalig, odino napalampasan na saray computer so sankaabigan a ‘singa-toon’ intelektual iran abilidad, laktip la angankoy pigara ed saray kapasidad to ed dunong tan inkaabilidad.” “Say ideyan nipaakar ed kabkaabigan a bili na saray robot a manggagawa lawarin amin ed kimey ed abung . . . so singa tudtua ed isabi taon a 2000.”
Ipapanengneng na agpakasarag na toon ipasakbay iray nagawa ed arapen so peteg a pidumaan a tuloy na abilidad na Dios. Alimbawa, ikompara iray abitlan prediksion ya impasakbay na Biblia ed ngalngali 20 siglo lay apalabas nipaakar ed agew tayo: “Saray totoo sikara naani so mangaro ed saray lamalaman da, maaro ra na pilak, managpasirayew, atagey a linawa, maayew, matulay ed saray kaatengan da malamang aliwa ran masimpit, anggapo so aro ra a nianakan, anggapo so panangasi ra, managpauges, aliwa ran maadia, maruksa ra, maingongot ed saray maabig, managliput, mayu-uges, mapasang, maaro ed saray likeliket, a lalo nen say dia ed Dios, a wala so nengneng da ya inkasanto, et ingen itapat da so pakayari na sayan inkasanto.”—2 Timoteo 3:1-5.
Sayan propesiya na Biblia nipaakar ed “saray kaunoran ya agew” et sakey labat ed dakel a nasusumpal la natan ed agew tayo. Impasakbay na Salitay Dios so “tanda” na kiwawala nen Jesus a laktipen toy guerra mundial, kakisiray tagano, saray salot, saray yegyeg, tan sankamundoan a panangipulong na maong a balita na Panarian na Dios.—Mateo 24:3-14; Lucas 21:11.
Say agnalingon inkasusto na saray sipan na Dios so amakiwas ed sakey a managsulat na Biblia a mangikuan ed dakel a siglo ed apalabas: “Anggapo so sakey a bengatla a linmiwat ed amin a maong a bengabengatla a si Jehova a Dios yo sinalita to nipaakar ed sikatayo. Sikara so agawa ya amin ed sikayo, anggapo so sakey a bengatla a linmiwat ed sikara.”—Josue 23:14.
On, makaseguro tayo ya amin a sipan na Dios so magano lan nagawa. Panganggaen na Panarian na Dios iray sakit, krimen, inkaadik ed druga, eras, tan bakal—say intiron dalin so magmaliw a paraiso. (Salmo 37:10, 11, 29; Apocalipsis 21:3, 4) Nailaloan mo so kasumpalan na sayan propesiya! Manlalapu iya ed Manamalsa tayo, “ya agto nayari manburi.”—Tito 1:2; ikompara so Hebreos 6:13-19.
[Picture Credit Line ed pahina 32]
Cleveland State University Archive