Silewan a Mangigiya’d Sika ed Basbas na Bilay

“OJEHOVA, amtak a say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.” (Jeremias 10:23) Diad sarayan salita et impanengneng nen propeta Jeremias ya agnayarian na totoo a sitatalonan igiya so basbas na bilay ya anggapoy tulong. Iner so pakaromogan na ontan a tulong? Oniay ebat na salmista ed pikakasi to ed si Jehova a Dios: “Say salitam sikato so sakey a silewan ya onkana ed saray salisalik, tan sakey a liwawa ya onkana ed basbas ko.”​—Salmo 119:105.

Saramay manaaral ed Salitay Dios, say Masanton Biblia, tan mangiiyaaplika’d ibabaga to et niyaliling ed sakey a ginmapon manbiahe ed palbangon ni. Diad gapo, daiset so nanengneng to lapud ambilunget ni. Balet legay ibubutay na banwa, ondarakel so nanenengneng to. Kabekta, say sinag na banwa so akapetek la ed sikato. Malinlinew ton nanengneng so amin a detalye. Ipanonot na satan ya ilustrasyon so sakey a proberbio ed Biblia: “Say basbas na matunong sikato so singa liwawa na kabuasan, ya onsinag ya onsinag angga ed nagnap ya agew.”​—Uliran 4:18.

Komusta balet iramay mangipulisay ed panangigiya na Dios? Oniay ibabaga na Biblia: “Say dalan na marelmeng sikato so singa bilunget: agda amta no anto so kagapolan da.” (Uliran 4:19) On, saray marelmeng et niyaliling ed toon napater-pater lapud bilunget. Anggan say singa itatalona ra et temporaryo labat, lapud “anggapo so kakabatan odino pakatalos odino simbawa sumpa ed Jehova.”​—Uliran 21:30.

Kanian, tumboken so panangigiya na Salitay Dios, say Biblia. No gawaen mo itan, naromog mon saray salita na Uliran 3:5, 6 et tua: “Manmatale’ ka ed Jehova ed simoon a pusom, tan agka onsaral ed tapew na dili a pakatalos mo. Dia ed saray amin a dalan mo sikato so bidbiren mo, et sikato itonton to so saray basbas mo.”