Report na Saray Manangiyabawag na Panarian

Say Makalinis a Pakayari na Salitay Dios

NIREPORT a kaslakan ya adik ed druga et ompapawil ed bisyo ra kapaway da manlapud saray rehabilitation center. Balet nagagawaan na Salitay Dios so mabetbet ya agnayarian na saray klinika. (Hebreos 4:12) Dakel so atulongan la na Salita tan espiritu na Dios a talonaan so inkaadik ed druga tan iyaplika so konsehon: “Linisan tayo komon so inkasikatayon dili ed ami tilol na laman tan espiritu, a yadyarien itayo na kasantosan dia ed takot ed Dios.”​—2 Corinto 7:1.

Ipapanengneng iya na sakey ya eksperiensia manlapud Myanmar. Onia so isasalaysay na sakey a lakin akipuligesgesan ed inkaadik ed druga ed loob na dakel a taon: “Nagmaliw ak ya adik ed druga legay inkatin-edyer ko. Aminpigapiga lan sinalik ya itunda, balet ta agko nagawaan. Pian nasuportaan so bisyok ed druga, nantakew ak. Bilang resulta, nen 1988, nipriso ak a sakey taon.

“Kayari inkibulos ko’d prisoan, intubat ko lamet so pipiulop ed datin kakaarok. Ag-abayag et nigalet ak lamet ed druga. Sayan makaderal na bilay a kurso so angitonton ed agla pilimog ed siak na membroy pamilyak. Niarum ni, lapud inkabusangel ko et tatakotan ak na dakel ed komunidad, tan papaliisan da ak met la.

“Insan sakey ya agew et agawa so agnapaliisan​—asobraan so dosis ko ed druga. Nipriso ak lamet, natan et diad loob na taloy taon. Anggaman alay irap so bilay diad prisoan, anggan panon et naanosan ko.

“Kasempet ko ed abung a nanlapud inkapriso, akiperdonaan ak ed pamilyak lapud apalabas iran kasalanan ko. Sipapangasi ra ak lamet ya inawat, balet aminsan lamet, sinagyat ak na kakaarok a pawiley datin kabibilay ko.

“Diad kaunoran, inrekomenda nen baik so sakey a pastor diad lugar mi pian makaatendi ak ed sakey ya eskuelaan nipaakar ed Biblia. Inmabobon so pastor. Balet, sakbay ya igapok lay onatendi, inkuan na panginaen ko, a sakey ed Tastasi nen Jehova, a no talagan labay koy manaral na Biblia, kaukolan a miaral ak ed Tastasi.

“Linmaak ed Kingdom Hall tan inkabat da ak ed sakey a lakin inmabobon ya iyaralan toak na Biblia. Dakel ed saray inmatendi so sililigsan angibano ed siak tan aliknak ya inabrasa da ak.

“Kayari impangigapok na panagaral na Biblia tan iyaatendi ed saray Kristianon miting, asalatan so panpirawat ed saray druga na pilalek a makaasingger ed Dios. Kayari sakey taon et inmaligwas ak anggad punton indedikak so bilay ko ed si Jehova a Dios, tan insimbolok itan a dedikasyon diad bautismo ed danum.

“Agano ni, legan a mankakabkaabungan, aromog koy sakey ed datin kaibak a mandrudruga. Agto natebek so pirmin impanguman ko. Saya so angilukas na pantasi, tan nitongtong ko ed sikatoy nipaakar ed ilalo ed Panarian.

“Aromog kon siansia so tuan gagala tan kabaliksan na bilay. Salamat ed tulong tan konseho na Dios manlapud Salita to, ta nayarian ko la natan a tulongan so arum a mangiwaklit ed makaderal a panangabuso ed druga.”