Wala so Nagugulon 403-Taon a Panamaley
DIAD Sweden et nanggayagaan na Simbaan tan Estado so maapit a siglaotan ed loob na masulok a 400 taon. Natan et say panamaley ed baetan na relihyon tan gobierno so onleletey.
Niletneg so “Lutheranism” nen 1593 bilang say relihyon na Estado, tan nepeg a nabautismoan so amin a Sueko. Dakel a taon ed saginonor, legan na dekaday 1850, walay impanguman. Agla kapilitan parad saray Sueko a nabautismoan; balet, siansian nibilang iran membroy Lutheran Church. Lapud ontan, inobliga iran manbayar na 1 porsiento na buwibuwisan ya anap da pian nasuportaay simbaan tan bayaran iray serbisyo sibil a gagawaey simbaan. Diad agano ni et sakey nin pananguman so agawa. Manlapulad 1952, saray Sueko so legal a makaekal ed simbaan tan sirin et nibulos la ed panbayar na baleg a kabiangay buis ed simbaan.
Dian agano niran taon et nantultuloy a linmukak so panamanlong na Lutheran Church ed Sweden. Ag-iya napaliisan, lapud say 10 porsienton manaayam ed Sweden et aliwan-Lutheran iran binmebeltang, pati saray Judio, Katoliko, tan Muslim. Kanian, diad kagapo na 1996 et 86 porsiento lambengat so Suekon kabiangan na Lutheran Church, tan say bilang et tuloytuloy ya ondaraiset.
Say pirmin agpananginunang so mamapaawang ed baetan na Simbaan tan Estado. Peles la, niyabawag a say ari so agla nakaukolan a magmaliw a Lutheran, tan saray ugugaw a nianak ed Lutheran ya ateng so ag-automatikon nakonsideran membroy Lutheran State Church. Niarum ni, unong ed The Dallas Morning News, kasabi na taon a 2000, “saray lokal a parokya tan say estado so nepeg a manguenta tan manapag ed baleg a kantidad na kaykayarian. Nepeg a bawasan na Simbaan so tinaon a badyet ton $1.68 bilyon (E.U.), a karaklan ed satan et kokolektaen ed saray buis.” Kayarin onggapo so siglo, say simbaan so makapanuro lay dili ton obispo.
Legan a babakbaken na agpananginunang tan idaraiset na membro so Kakristianoan, say Tastasi nen Jehova ed Sweden so tuloytuloy ya ombubulaslas. Irereport na 1997 Yearbook of Jehovah’s Witnesses a wala so 24,487 a manangipalapag na Panariay Dios ed satan a dalin, tan onliligadad 10 porsiento so manpupulong bilang sigpot-panaon a payunir a ministro. Dakel ed saraya so manadampot ed babaleg iran pribilihyo ed serbisyo. Alimbawa, legan na saray 1995 a pandistriton kombension na Tastasi nen Jehova, 20 a sanaasawa so angisubmiti na aplikasyon parad panmisioneron panagsanay diad Watchtower Bible School of Gilead. Diad satan a panaon et wala lay ngalngalin 75 a Suekon nangraduar ed apalabas laran klase a manmimisionero ed nanduruman parti na mundo. Andi-duaruwan say maabig ya alimbawa ra tan makapaseseg iran sulat tan ibibisita ra so walaan na makapasagyat ya epekto ed saramay panpipilalekan da met iyan engranden pribilihyo.
Kanian, legan a sasagmaken na minilyon ed Kakristianoan so beblay ed espiritu, say Tastasi nen Jehova so ‘mankakanta a nisengeg ed liket na puso.’—Isaias 65:13, 14.
[Mapa ed pahina 30]
(Parad aktual a format, nengnengen so publikasyon)
Sweden