Report na Saray Manangiyabawag na Panarian
‘Pasindagen Yo so Silew Yo ed Arap na Totoo’
DIAD Sermon to ed Palandey, oniay inkuan nen Jesus ed saray babangatan to: “Sikayo so silew na mundo.” Intuloy toran pinaseseg: “Pasindagen yo komon so silew yo ed arap na saray totoo, pian nanengneng da so saray maong a gawa yo, et galgalangen da so Ama yo a wala ed tawen.”—Mateo 5:14-16.
Naiimano la ed Italya iray maabig a kimey na Tastasi nen Jehova. Alimbawa, say maabig a kondukta ra sano aatendian da so tinaon iran kombension da so akapangidayew ed Dios, a singa pepekderan na onggendan iran report:
▪ Diad loob na dakel a taon tinulongan na sakey ya ina so anak ton bii ed Terni, Italya, a mangipakurang ed panagpakapean ton walad asingger na istadyum ed satan a syudad. Insalaysay to: “Naimanok so baleg a pidumaan ed baetan na saramay oonla’d parad saray galaw a soccer tan saray delegado ed saray kombension na Tastasi nen Jehova diman. Mas masimpit iray Tastasi ed panangawes da, tan sikaray matua tan magalang. Mabetbet kon panumamengan no panon a makapankakasakey iray totoo ed nanduruman rasa.
“Sakey ya agew et sinabat ak na sakey a Tasi ed kalsada tan nantepet no amtak so ngaran na Dios. Agko amta, balet lapud kabat ko a maong a totoo iray Tastasi nen Jehova, inmabobon ak a dalawen to ak. Walaray tepet ko nipaakar ed kipapasen na inaatey, ya inebatan to manlapud Biblia. Anggapoy suppiat, inawat ko so panagaral na Biblia, et duaran simba ed saginonor, inmatendi ak met la ed saray miting.
“Diad inmuna sinumpa ak na anak kon bii, balet inuman na konduktak tan determinasyon ko so awawey to. Akapanaral ak na Biblia ed loob na siameran bulan. Natan say anak ko tan say masiken to so maapresyan mangokomento ed Tastasin parokyano ed panagpakapean da. No nipaakar ed siak, abautismoan ak ed sakey a kombension ed sayan istadyum.”
▪ Kayari kombension ed Roseto degli Abruzzi, inkuan na manedyer ed sakey a pasen na kampo: “Naimanok a matuan tuloy so Tastasi nen Jehova ed amin a gagawaen da. Nen imbeneg a simba, awalaan ak na 40 ed sikara ed pasen na kampok, tan ag-ira sengegan na antokaman a problema. Diad pidumaan, sikara lambengat so ondago tan mangibaga ed sika no masulok so totoon manaayam ed trailer odino tolda. No nipaakar ed siak, sikaray sankaabigan a parokyanon naromog mo.”
▪ Kayari na satan a kombension, inkuan na sakey a manedyer na hotel: “Mareen ya amin iray Tastasi nen Jehova. Ag-ira magulo, tan masakbay iran onuugip. Sikaray peteg a mapangasi, matua, tan mareen. Alay abig komon no amin et singa sikara. Say arum so mantatakew na antokaman—saray vase, ashtray, anggan toilet paper tan asukar! Anggapo ni agawan ontan ed sikayo. Sano mangala na sorbetes iray anak yo ed refrigerator no labi, agko panpapagaan so iyakar pian tsiken no anto so inala ra. Kuentaen da ni pigay nala ra tan manbayar iran tampol. Manmamatalek ak a maong ed sikara. Agaylay abig komon no say arum et singa ontan! Kaliktan kon amin komon a bisitak et Tastasi nen Jehova.”
Bantog so Tastasi nen Jehova ed Italya, a singa met ed dakel a parti na dalin. Sikaray ‘masimpit ed tongtongan da ed utel na saray bugkalot’ tan diad ontan et diad kirayewan na tuan Dios, a say ngaran to so aakbibiten da.—1 Pedro 2:12.