Sananey nin Impanbiktorya Parad Tastasi nen Jehova ed Gresya

NEN Oktubre 6, 1995, sakey a legal a kason lalanoren toy duaran sigpot-panaon a ministro na Tastasi nen Jehova so inusay na taloray-membron Mahistradon Korte ed Atenas. Say dalem et proselitismo, tan satan so indemanda na sakey a polis kayarin sikatoy dinalaw na Tastasi ed ayaman to.

Impanengneng na saray tepet ya intepet na manangidaulon huis a sikatoy interesadon maong ed kimey na Tastasi nen Jehova. Alimbawa, intepet to: “Kaunongan la kabayag yon gagawaen itan a kimey? Komustay tratamento na totoo ed sikayo ed loob na saray taon? Komusta met lay nengneng na ikikiwas ed kimey yo? Anto tay ibabaga yo’d totoo ed puerta ra? Amin a wadman ed korte so tinmalineng a maong ed maabig a testigon niiter.

Lalon asurprisa so Tastasi, ta anggan say piskal so nansalitan pabor ed sikara. “Walaan so Tastasi nen Jehova na konstitusyonal a kanepegan ya agda labat sisiaen tan dayewen so Dios da,” so imbalikas to ed pansaran paliwawa to, “noagta ontan met pian ikayat so pananisia ra ed kaabungan, ed plaza, tan ed lansangan, pangibunog ni ingen na literatura ra a libre no kaliktan da.” Binitla na piskal so nanduruman desisyon na inkaabsuelto ya impasa na saray korte tan say Council of State. Tinukoy to met so kason Kokkinakis v. Greece, a satan so denisedi na European High Court of Human Rights bilang pabor ed Tastasi nen Jehova.a “Ipangasin imanoen,” impasakbay na piskal, “a say Gresya et nambayar ni ingen na multa ed satan a kaso. Kanian nepeg tayoy maalwar a tuloy sano nakerew itayon mangukom ed ontan iran kaso. Diad tua, diad gapo et agla nepeg komon a makasabi ed korte irayan kaso.”

Kayari impanpaliwawa na piskal, anggapo lay nibaga na abogado na Tastasi. Anggaman kuan, inanamot toy pankanawnawa pian idanet a say ley a proselitismo et aliwan konstitusyonal tan satan et sengegay pakaduaruwaan na Gresya diad internasyonal a laknab.

Nilimgis lambengat na manangidaulon huis so duaran huis, tan say agin laki tan agin bii so nankakasakeyan ya inabsuelto. Say bista, a nansumpal ed sakey oras tan samploran minuto, so sakey ya impanbiktorya ed namparan ngaran nen Jehova tan totoo to.

Saya so komapat ya inkaabsuelto nipaakar ed saray kaso na proselitismo kayarin nausay na European Court of Human Rights so kaso nen Kokkinakis. Maliket iray Tastasi nen Jehova ed Gresya a saray problema a misiglaotan ed panagpulong da so natan et ngalngali la naandi tan posibli la so pangituloy ed kimey ya andiay pakasbel.

[Paimano ed leksab]