Amin Kasi et Madibinon Puyan?

KASIN say espiritu na Dios, ya angipuyan ed Masanton Biblia, et nansengegan met na arum a libron kokonsideraen na arum a masanto? (2 Timoteo 3:16) Pinalesa iyan tepet na sakey ya Italyanon Jesuit a palapagan (La Civiltà Cattolica), a nipalapag ed “silong na panangiwanwan na [Vatican] Secretariat of State” tan sirin akonsidera a walaay autoridad ed limog na saray Katoliko.

Inkuan na Jesuit a palapagan a, “say Dios, diad panamegley na kiwas na Masanton Espiritu, so angisibwag ed bini na Salita pati ed arum niran masanton libro na aliwan-Judio tan aliwan-Kristiano iran tradisyon.” Parad saray Jesuit, saray “masanto” a libro, a singa say Zoroastrian Avesta odino say Confucian Four Books, so nisulat “tekep na nikabkabiig ya impluensya na Masanton Espiritu, tan sirin, anggan panon et mankarga na ‘madibinon puyan.’”

Anggaman ontan, nanggaway panamalinew so artikulo. Ibabaga ton, “aliwan amin ed lugan na saratan a masanton libro so salita na Dios,” a mangiyaarum ni a saray angisulat ed sarayan libro so nayarin “akasagmak na impluensya ed sakey a politiyestikon kaliberliber odino say pilosopikal a kipapasen” a nanbilayan tan nankurangan da. Unong ed si Marco Politi, a manangibalita ed saray kurang na Vatican parad Italyanon dyaryo a La Repubblica, sayan talindeg so “mangilulukas ed datin impasen ya imposiblin pansiglaotan na Iglesia Katolika tan saray maawaran a tuloy a relihyon,” a pinmapawil ed espiritu na nanduruman asamok-ed-pananisia iran “prayer meeting” a singa samay agawa ed Assisi nen 1986, a mabiskeg ya inyalibansa nen Juan Pablo II.

Si Jehova so aliwan sakey a Dios na kolkol tan wetwet. (1 Corinto 14:33) Kanian agsusto so pangikuan tayo a say masanton espiritu, odino aktibon puersa to, so mamuyan ed anggan sakey a kabiangan na antokaman a libron agsigpot a mitunosan ed Salita to, say Biblia. Imbes ya ipaseseg iray paraan a pankasakeyen so nanduruman “relihyoso iran tradisyon,” insulat na Kristianon apostol a Pablo a wala so “saksakey ya ilalo . . . , sakey a Katawan, sakey a pananisia, sakey a binyag.”​—Efeso 4:4, 5.

Satan a “saksakey ya ilalo” so mantegteen ed pangagamil na pananisia ed si Jesu-Kristo. Matukotukoy so ibabaga na Biblia: “Anggapo so arum a kilabanan, ta anggapo so arum a ngaran ed lepsag na tawen, a niiter ed saray totoo, a nayarin kilabanan tayo.” (Gawa 4:12) Anggapo lay arum a “masanton libro” a mangiprepresenta ed si Jesus bilang say importantin persona ed pakasumpalan na saray gagala na Dios. Salambengat no awaten tayo so Biblia a bilang say Salita na Dios a naibangat to itayo nipaakar ed maaron probisyon nen Jehova a Dios parad kilalaban.​—Juan 17:3; 1 Tesalonica 2:13.